Gr. 11 se hofsaak uitgestel
2010-02-18 12:06
Johannesburg – Die saak van ‘n gr. 11-leerling wat die onderwysdepartement gedagvaar het omdat hy na gr. 12 bevorder wil word, is uitgestel, het sy prokureur Donderdag gesê.
Volgens adv. Tebogo Frank Mathibedi is die saak tot Vrydag 26 Februarie om 10:00 in die Gauteng-Suid hooggeregshof uitgestel.
Die saak sou Donderdag plaasgevind het.
Edwin Botha, ‘n 18-jarige A-student aan die hoërskool Noordheuwel in Krugersdorp het in Oktober 2009 uit die skool gegaan voordat hy sy gr. 11-eksamens geskryf het.
Hy beweer dat ‘n inlywingseremonie vir nuutverkose prefekte daartoe gelei het dat hy getraumatiseerd was. Hy was verkies as onderhoofseun.
Die hofsaak handel oor ‘n ooreenkoms tussen Botha se ouers, Hugo en Zenda Botha, en die skoolhoof dr. Jac Fourie.
Botha het oorspronklik beplan om na ‘n ander skool te skuif, maar het in Desember van besluit verander en gevra of hy kan terugkeer na sy ou skool.
Fourie het na bewering ‘n geskrewe ooreenkoms gegee dat Botha as gevolg van sy uitstekende akademiese rekord na gr. 12 bevorder sal word.
Tog het Botha later ‘n brief van die Gautengse onderwysdepartement ontvang wat gesê het dat hy mag terugkeer na die skool, maar as ‘n gr. 11-leerling.
Die hof het die skool intussen beveel om Botha as ‘n gr. 12-leerling in te skryf, maar indien hy die saak verloor kan hy teruggeplaas word na gr. 11.
- Sapa