Goue fliekjaar vir Suid-Afrika
2009-12-27 09:36
Henry Cloete
Henry.Cloete@rapport.co.za
Kaapstad - Van District 9 se klik-klak-kletsende ruimtewesens tot die Hollywood-ster Matt Damon se Afrikaanse “ouens, moenie têkkels mis nie” in Invictus – 2009 was ’n góúe jaar vir Suid-Afrika in die rolprentbedryf.
Benoemings vir Oscars in 2010 word eers op 2 Februarie bekend gemaak. Maar alles dui daarop dat veral Invictus (die storie van oudpres. Nelson Mandela se nasieboupoging tydens Suid-Afrika se veldtog in die Wêreld- beker-rugbytoernooi in 1995) vir ’n paar goue beeldjies kan sorg.
Invictus is al vir drie Golden Globes benoem (Morgan Freeman vir beste akteur, Matt Da-mon vir beste byspeler en Clint Eastwoord vir beste regisseur).
Dat District 9 net ’n enkele benoeming vir ’n Golden Globe gekry het (beste oorspronklike draaiboek vir Neill Blomkamp en Terri Tatchell) is allerweë as ’n verrassing beskou.
Die rolprentweergawe van J.M. Coetzee se bekroonde roman Disgrace, met John Malkovich in die hoofrol, het teatergangers wêreldwyd ook vanjaar geïmponeer.
En die jong Kapenaar Oliver Hermanus se Shirley Adams is pas by die Amiens-rolprentfees in Frankryk met die prys vir die beste rolprent vereer.
Dié roerende verhaal van ’n ma op die Kaapse Vlakte wat na haar verlamde seun omsien, het vroeër ook by die Durbanse Internasionale Rolprentfees pryse ontvang.
- Rapport