Gospelsanger se vrou verkrag
2010-02-10 07:23
Johannesburg - ’n Bekende gospelsanger se vrou is vroeg Dinsdagoggend op die boonste verdieping van die gesin se huis in ’n veiligheidskompleks in Centurion verkrag terwyl haar man magteloos onder in die huis vasgebind gesit het.
Nadat sy verkrag is, het die leier van die bende hul slagoffer om verskoning gevra oor wat met haar gebeur het “because we don’t do rape”.
Kapt. Colette Weilbach, polisiewoordvoerder, het Dinsdag gesê die bendeleier het aan die vrou gesê dat haar verkragter nuut in die bende is en dat hy (die leier) “reeds met hom geraas het”.
Volgens Weilbach was die sanger omstreeks 02:15 besig om op die onderste verdieping van hul huis te werk terwyl sy vrou en drie jong kinders op die boonste verdieping geslaap het.
Vier misdadigers het deur ’n oop venster ingeklim. Hulle het die sanger oorval, ’n vuurwapen op hom gerig en hom vasgebind.
Een van die mans het na die hoofslaapkamer op die boonste verdieping gegaan waar hy die sanger se vrou verkrag het. Dit was hierna dat die bendeleier haar om verskoning gevra het.
Volgens Weilbach het die mans die sanger se rekenaar en selfone geroof en dit in sy motor gelaai.
Hulle het hom in die motor ingeboender en gedwing om by die valboom van die veiligheidskompleks, wat deur veiligheidswagte beman word, uit te ry. Die sanger het die veiligheidswagte nog gegroet voordat hulle vir hom die valboom oopgemaak het, het Weilbach gesê.
Die booswigte het die sanger by die St. George’s-hotel afgelaai, waarna hy terug huis toe moes loop.
Die egpaar se kinders het deur die hele voorval geslaap.
Die sanger en sy gesinslede se name word weerhou om hul identiteit te beskerm.
Volgens Weilbach is die motor gistermiddag omstreeks 15:00 verlate langs die pad in Tembisa aan die Oos-Rand deur lede van die Pretoria-blitspatrollie gevind.
’n Saak van verkragting en huisroof word ondersoek. Niemand was teen druktyd nog in hegtenis geneem nie.
Beeld het verneem dat die sanger se vrou ná die voorval in ’n plaaslike hospitaal opgeneem is, maar Dinsdagaand ontslaan is.
- Beeld