Gordhan optimisties ondanks uitdagings

2013-02-28 08:24

Johannesburg – Minister Pravin Gordhan is gesond, al het hy deur die loop van sy begrotingstoespraak in die parlement Woensdag met 'n lastige hoes gesukkel.

"Ek voel fantasties," het hy Donderdagoggend by 'n sakeontbyt van die New Age gesê.

Gordhan het gesê Suid-Afrikaners is tevrede met die begroting vir die volgende finansiële jaar en hy is oortuig dat die regering die regte besluite geneem het.

"Sakevertroue sal lei tot beter groeivooruitsigte."

Hy het gesê die huidige ekonomiese klimaat is moeilik "vir almal van ons".

"Ons probeer op die oomblik herstel. Die uitdaging vir ons is hoe ons baie beter kan doen en groei."

Gordhan het gesê R16 miljard se inkomste het die laaste finansiële jaar verlore gegaan.

"Ons vra almal wat ons belasting skuld, om ons te betaal."

Hy het ook gesê die manier hoe die land die volgende twee jaar werksgeleenthede skep sal van deurslaggewende belang wees.

Gordhan het voorts die besluit om vanjaar nie inkomstebelasting te verhoog nie, as 'n "vrygewige gebaar deur die regering" beskryf.

– Volg Nuus24 op Twitter.

- SAPA