Goedhartige De Doorns-boere gedreig
2009-11-19 07:30
Jan Gerber
De Doorns - Van die boere wat Zimbabwiese plaaswerkers te hulp gesnel het wat Dinsdag in xenofobiese geweldpleging uit hul huise in De Doorns verdryf is, het kort daarna dreigemente ontvang.
Dié dreigemente kom op dieselfde dag dat die minister van arbeid, Membathisi Mdladlana, gedreig het dat daar “soos ’n ton rotse” toegeslaan sal word op boere wat onwettige immigrante in diens neem omdat hulle xenofobiese geweld aanhelp.
Die dreigemente wat plaaslike werkers glo gemaak het teen De Doorns-boere wat skuiling aan hul Zimbabwiese werkers gee, is skerp deur onder meer die Hexriviervallei Tafeldruifassosiasie en Agri Wes-Kaap veroordeel.
Verskeie boere het aan hul Zimbabwiese werkers skuiling gebied nadat plaaslike inwoners sowat 3 000 Zimbabwiërs uit hul wonings in De Doorns gedryf, huise afgebreek en hulle verbied het om te gaan werk.
Die plaaslike inwoners beweer die Zimbabwiërs is bereid om vir minder as die minimum loon te werk en steel die plaaslike bevolking se werksgeleenthede.
’n Verklaring van Agri Wes-Kaap lui: “Die landbousektor is moeg daarvoor om elke keer van allerhande onwaarhede beskuldig te word sonder dat die aantygings met feite gestaaf word. Hierdie onwaarhede word misbruik om sensasie te veroorsaak en persepsies te skep wat nie bestaan nie.
“Die buiteland se oë is reeds op ons en aanvalle op onskuldige mense is beslis nie voordelig vir die land se beeld nie – en baie beslis ook nie bevorderlik vir die beeld van landbou nie.”
Boetie Kriel, ’n direkteur van die Hexriviervallei Tafeldruifassosiasie, waartoe al die produsente in dié vallei behoort, het gesê dié vereniging se lede kom die wette nougeset na en hulle sal sorg dat ’n produsent wat die wet oortree, vervolg word.
“Só ’n persoon sal nie weggesteek word nie,” het Kriel gesê.
Hy het bygevoeg die meerderheid produsente betaal hul plaaslike sowel as buitelandse werknemers meer as die voorgeskrewe loon. Volgens Kriel doen die bewerings die Hexriviervallei se beeld groot skade aan en is dit duidelik dat “aanstigters in De Doorns” die situasie veroorsaak.
Fatima Shabodien, uitvoerende direkteur van die drukgroep Women on Farms, het gister die sowat 2 000 ontheemde Zimbabwiërs op De Doorns se rugbyveld besoek.
Sy meen die wortel van die kwaad is die uitbuiting van plaaswerkers.
Sy gee toe die Zimbabwiërs word die minimum loon betaal, maar die meeste kry nie kontrakte nie en hulle is kwesbaar weens hul vlugtelingstatus.
“Die punt is: Hoe beskerm ons plaaswerkers se regte? Die departement van arbeid moet sy deel doen,” het sy gesê.
- Die Burger