'Godsdiens in skole gaan monster skep'
2011-07-17 07:20
Johannesburg – Afrikaners wat hand en tand veg vir die reg van skoolbeheerliggame om Christelike onderrig in skole te vestig skep ’n monster wat later buite beheer gaan raak.
Dié Afrikaners gaan nog krokodiltrane huil, het dr. Jan van der Merwe, oud- uitvoerende lid van die Afrikanerbond en ’n ANC-raadgewer, die afgelope week gesê toe hy as gespreksleier opgetree het by ’n boekbespreking op die Vryfees.
In groter dorpe en stede waar Afrikaanse mense in skole die botoon voer, pas dit hulle baie goed om godsdiensbeleide te beheer. Maar op die platteland waar skole parallelmedium word, gaan Afrikaners mettertyd byna nêrens meer die meerderheid wees nie. As voorbeeld het hy die dorp Wepener genoem waar 80% van die ouers by die skool nie wit is nie. Hulle kan argumentsonthalwe daarop aandring dat hul ZCC-oortuigings met elemente van voorvaderverheerliking in die skool uitgeleef moet word, het hy gesê.
Hans Pietersen, skrywer van Die vrese van ons vaders, het met Van der Merwe saamgestem dat die voorgestelde beleid van Kader Asmal, voormalige minister van onderwys, dalk die beste was. Daarvolgens moes godsdiens by skole uitgefaseer word.
Pietersen het in 2009 groot opslae gemaak toe sy organisasie, die Afrikaner-Vrydenkersbeweging (AVB), sy stryd teen godsdiens in skole formeel gemaak het. Talle onderwys- en burgerregte-organisasies het daarteen te velde getrek en aangebied om skole met regskoste te help.
Rapport kan vandag onthul dat die werk van die AVB voortaan verrig gaan word deur die Organisasie vir Godsdienste-onderrig en Demokrasie (Ogod). Volgens Pietersen sal hulle die staat help om hul funksies te verrig en godsdiensbeleide volgens wet toe te pas. Daar is verskillende interpretasies van wetgewing en die kwessie sal waarskynlik in die howe draai.
By die boekbespreking het hy benadruk dat alle godsdiensbeoefening nie sleg is nie. “Ek is nie anti-godsdiens nie. Ek is nie anti-Christenskap nie. Ek is nie anti-Jesus nie. Ek is absoluut anti-manipulering.”
Hy het verwys na ’n sesjarige kind wat by sy onderwyser moes hoor hy gaan hel toe. “Dit is onvanpas en absurd.”
Dit verstom Pietersen dat Afrikaners graag hof toe gaan vir hul “minderheidsregte”, maar tevrede is met situasies waar hulle die meerderheid is en ’n enkele Moslem-kind in ’n klas byvoorbeeld blootgestel word aan ’n onderwyser wat kinders vra om hande op te steek as hulle nie in Jesus glo nie.
Oor die boek en die doodsdreigemente wat hy en sy familie al “in die naam van Jesus-liefde” ontvang het, sê Pietersen hy het “die bewustelike besluit geneem om aggressief deel te neem aan die gesprek sodat ek die deur kan oopkry”. “Ek hoop ek kry dit reg en ek hoop ek oorleef dit.”
– Volg Nuus24 op Twitter
- Rapport