'God, help ons as Juju president word'

2012-09-27 10:16

Johannesburg – Jackson Mthembu, woordvoerder vir die ANC, sê dit sal ‘n donker dag vir die land wees indien Julius Malema ooit president word.

Beeld berig eNCA het Woensdag ‘n onderhoud met die woordvoerder gevoer.

“Kan jy jouself indink as Julius Malema ooit president van die land word. O, liewe Heer, mag daardie dag nooit in ons of ons kinders se leeftyd gebeur nie,” het die woordvoerder aan die nuuskanaal gesê.

Luidens die berig het Mthembu ook gesê Malema moes nooit ‘n lid van die ANC wees nie, omdat hy ‘n slegte mens was.

Mthembu het bygevoeg dat die geskorste leier van die ANC se jeugliga moet ophou om sy mening te lug oor of pres. Jacob Zuma as leier van die ANC benoem moet word.

“Hy is nie eens ‘n lid van die ANC nie. Hy kan niemand benoem nie. Mense sluit vrywilliglik by die ANC aan, maar dan word daar van hulle verwag om sekere waardes te handhaaf en Julius kon dit nie doen nie.”

Mthembu het ook enige ANC-leier wat oorweeg om Malema te ondersteun, gewaarsku.

“Hy is te eiesinnig... hy dink hy’s als. Hy ondersteun dalk nou ‘n leier, maar hy sal binne drie jaar heeltemal omkeer,” het hy gesê.

Volg Nuus24 op Twitter   

- SAPA