G’n x-strale meer by 1 Mil
2011-11-04 09:05
Johannesburg – 1Militêre Hospitaal, wat in ’n stadium een van die spoghospitale in die land was, kan nou nie eens meer sy eie x-straalfoto’s neem nie.
Die laaste radiografis het in Oktober bedank, wat beteken al die x-straalfoto’s moet nou privaat, teen aansienlik hoër koste, geneem word.
Die hospitaal het boonop haas geen spesialiste oor nie. Daar is geen toraks-, neuro-, plastiese of vaskulêre spesialiste nie, terwyl daar ’n erge tekort aan ortopediese chirurge is, het van die dokters aan Beeld gesê.
In die ortopediese, chirurgiese en ginekologiese departemente word konsultante ten duurste deeltyds gebruik. Junior dokters behartig die res van die konsultasies.
Selfs in die hoësorgeenheid is ’n gewone algemene praktisyn in beheer, wat volgens sy kollegas op “doodsake” neerkom.
Herhaaldelike telefoniese en skriftelike versoeke om klarigheid oor die situasie by die hospitaal en die weermag te kry het die afgelope drie weke op dowe ore geval.
Die verskaffing van oogdienste is onlangs heeltemal opgeskort en die uitreiking van brille gestaak. Dié diens is blykbaar pas gedeeltelik herstel.
Operasies en mediese dienste word weens ’n tekort aan dokters al hoe meer teen astronomiese koste aan private hospitale uitgekontrakteer.
Slegs twee van die tien teaters word tans gedeeltelik gebruik.
Die dokters wat oorgebly het, kan volgens van hulle eenvoudig nie meer die mas opkom teen die geweldige vraag na dienste nie.
Dit duur tot ses maande voordat pasiënte ’n afspraak in sekere spesialis-afdelings kan kry.
Volgens ’n dokter wat pas sy bedanking ingedien het, word hy drie jaar nadat hy as spesialis gekwalifiseer het steeds as mediese beampte sonder spesialiskwalifikasies betaal.
Al sy vertoë om aangestel te word as spesialis op die posvlak wat hom toekom, het niks opgelewer nie. Nou gaan hy elders werk.
Ironies het hy en talle ander spesialiste in dieselfde bootjie op weermagkoste as dokters en spesialiste gekwalifiseer. “Die weermag het betaal om ons beter te laat kwalifiseer juis omdat daar so ’n tekort aan spesialiste is, maar nou verwag hy dat ons dié diens gratis moet lewer terwyl spesialiste wat van buite aangestel word meer as ons betaal word,” het die dokter gesê.
Van die senior spesialiste wat afgetree en hul dienste op deeltydse grondslag aangebied het, word nie gevra om in die hospitaal te gaan help nie.
Die laaste paar maande het pasiënte wat lankal op operasies wag selfs nadat hulle vir opname by die hospitaal opgedaag het eers uitgevind hul operasies is uitgestel.
Net operasies vir lewensgevaarlike toestande en die minimum roetine-operasies word tans uitgevoer en die meeste daarvan word weens ’n gebrek aan spesialiste aan private hospitale uitgekontrakteer.
Die hospitaal het pas ’n nuwe bevelvoerder gekry. Kol. N.P. Maphaha van 2 Militêre Hospitaal in Kaapstad is met bevordering in dié pos aangestel.
Volgens van die oorblywende dokters is al hul hoop nou gevestig op Maphaha, wat ’n uitstekende reputasie in Kaapstad gehad het, anders sal hulle nie anders kan as om ook elders te gaan werk nie.
Die laaste amptelike syfers vir doktersposte in 1 Militêre Hospitaal was dat sowat 52% gevul en 48% vakant is.
Volg Nuus24 op Twitter.