G’n matriek, g’n werk
2010-08-23 08:16
Johannesburg - ’n Stenograaf kan ná 17 jaar nie haar pos in die departement van justisie behou nie omdat sy nie ’n matrieksertifikaat het nie, maar sy is goed genoeg om matrikulante op te lei om dié werk te doen.
Ria Forbes (58), voormalige stenograaf van die Pretoria-Noord-streekhof, het boonop verlede week gehoor die staatsdiens se algemene sektorale bedingingsraad het haar aansoek om kwytskelding vir laat indiening in haar geskil oor haar ontslag van die hand gewys.
Forbes het haar geskil aanvanklik by die Kommissie vir Versoening, Bemiddeling en Arbitrasie (KVBA) aanhangig gemaak.
Die KVBA het beslis hy het nie die jurisdiksie om daaroor te beslis nie en het Forbes na die bedingingsraad verwys.
Dié raad meen egter Forbes, wat net gr. 10 het, het nie ’n goeie vooruitsig op sukses in haar geskil nie en het haar aansoek van die hand gewys.
Die arbitrasiesaak van Linda Martins (42), ’n voormalige stenograaf van die Johannesburgse landdroshof, oor onregverdige ontslag sal op 8 September aangehoor word.
Martins het 15 jaar lank met haar gr. 10-kwalifikasie as stenograaf gewerk.
Die departement het die kontrakte van 36 stenograwe van landdroshowe in Gauteng beëindig omdat hulle nie matriek het nie.
Nie een van die stenograwe kwalifiseer vir werkloosheidsversekering nie omdat bydraes nooit van hulle verhaal is nie.
Al die stenograwe hoop Martins se arbitrasie sal suksesvol wees.
Hul geskil met die departement het in 2007 begin toe hul werkomskrywings as stenograaf eensydig deur die departement “opgegradeer” is om werk wat hulle jare reeds doen in te sluit.
Die departement het besluit matriek is ’n vereiste van die opgegradeerde pos.
Die stenograwe het tot 2010 gekry om matriek te slaag.
Van die departement se beloftes om hulle met ’n opleidingsprogram te help om dit te doen, het dadels gekom.
Martins het gister gesê sy skoei haar geskil op ’n staatsdiensregulasie wat bepaal dat amptenare wat langer as twee jaar diens het, nie ’n matrieksertifikaat nodig het nie.
Forbes en Martins moes die matrikulante wat hul werk oorgeneem het vir die departement oplei.
Martins swerf sedertdien tussen familielede omdat sy nie haar eie verblyf kan bekostig nie.
Forbes en haar man moet van sy salaris van R6 000 per maand leef.
Intussen werk stenograwe met net gr. 10 steeds in die hooggeregshof in Pretoria nadat hulle vroeër met die hulp van ’n prokureursfirma aansoek gedoen het om ’n hofbevel om die departement te verbied om hulle te ontslaan.
Die aansoek is onbepaald uitgestel nadat die staatsprokureur namens die departement aan die hof onderneem het om te “herbesin”.
Regter Willie Hartzenberg het toe gesê die departement moet eers met die regters praat voordat hulle voortgaan met die vereiste van matriek.
- Beeld