G’n arts vir gewonde soldaat
2010-11-06 07:12
Pretoria - Die weermag het ’n hoëvlak-ondersoek belê nadat ’n Suid-Afrikaanse vredesoldaat in Soedan gisteroggend vroeg deur aanvallers gewond is en geen dokter beskikbaar was om hom te behandel nie.
Ene sktr. Nzoko van 5 SA Infanteriebataljon (5 SAI) in Ladysmith, KwaZulu-Natal, was gisternag saam met drie makkers op wagdiens op ’n wagtoring by ’n waterput sowat 3 km noordoos van Koetoem in Noord-Darfoer.
Nzoko het glo afgeklim om ’n draai te gaan loop toe twee onbekende aanvallers op hom losgebrand het.
Vier skote is op hom geskiet, waarvan twee hom in die linkerskouer en -bobeen getref het. Sy makkers het op die aanvallers geskiet, waarna hulle gevlug het.
Hulle het hulp ontbied, waarna die Suid-Afrikaners ’n reaksiemag en Casspir-ambulans van hul basis by Koetoem na die toneel gestuur het.
Operasionele mediese ordonnanse moes noodgedwonge na Nzoko, wat in ’n kritieke toestand was, omsien.
Hy is na die siekeboeg in Koetoem geneem, van waar hy later gisteroggend na ’n hospitaal op El-Fâsjer, suidwes van Koetoem, afgevoer is. Na verneem word, was sy toestand gistermiddag laat ernstig, maar stabiel.
Die twee Suid-Afrikaanse dokters wat tot sowat twee weke gelede nog deel van die Suid-Afrikaanse kontingent was, het na Suid-Afrika teruggekeer sonder dat hulle vervang is.
Brig.genl. Martie Visser, weermagwoordvoerder, het gister gesê die hoëvlak-ondersoek sal bepaal waarom daar geen dokters was nie.
Die dokters in Soedan roteer elke drie maande. Na verneem word, was die twee dokters in Soedan veronderstel om vir ’n maand langer te bly omdat daar nie plaasvervangers vir hulle was nie.
Hulle het egter met ’n kommersiële vlug na Suid-Afrika teruggekeer.
Die kontingent van 5 SAI het maar sowat twee weke gelede in Soedan aangekom waar hulle vir ses maande sal help om die vrede in die toenemend gespanne politieke situasie in die land te handhaaf.
Sowat twee jaar gelede is ’n Suid-Afrikaanse soldaat doodgeskiet en ’n vrouesoldaat gewond toe hulle ook ’n waterput in Soedan bewaak het. Dit is nie bekend of dit dieselfde put was as die een waar Nzoko geskiet is nie.
Die Suid-Afrikaners is deel van ’n gekombineerde mag van die Verenigde Nasies en die Afrika-Unie (Unamid) in Soedan.
Nzoko sal na verwagting sodra sy toestand dit moontlik maak na Suid-Afrika afgevoer word vir verdere behandeling.
’n Plaasvervangerdokter wag tans glo dat die nodige reisdokumente goedgekeur word voordat hy Soedan toe vertrek.
Tot dan is die soldate op die mediese ordonnanse aangewese vir noodhulp.
Unamid het gister in ’n verklaring ’n beroep op die Soedanse owerheid gedoen om die aanvallers op te spoor en te vervolg.
- Beeld