Gigaba: Elektrisiteit in SA 'gebalanseerd'
2013-02-10 09:02
Johannesburg – Suid-Afrika se vraag en aanbod van elektrisiteit het ‘n balans bereik, het Malusi Gigaba, minister van openbare ondernemings, Saterdag gesê.
“Die land se kragstelsel is onder druk, maar ek is bly om bekend te maak dat beide Eskom en die regering daarin kon slaag om die vraag en aanbod vir elektrisiteit te balanseer in die land,” het hy by die Seshego-sokkerstadium in Polokwane gesê.
Hy het die gemeenskap aangemoedig om elektrisiteit spaarsamig te gebruik tydens die provinsiale bekendstelling van die 49M-veldtog in Limpopo.
Die veldtog, wat in Maart verlede jaar in die land bekendgestel is, is daarop gemik om individue en sakeondernemings aan te moedig om energie op slim wyses te gebruik.
Gigaba het bygevoeg dat, alhoewel ‘n balans bereik is, het die regering met kommer opgemerk dat energie stadig maar seker ‘n skaars hulpbron word.
“Dit is met hierdie agtergrond dat 49M bekendgestel is, om Suid-Afrikaners aan te moedig om saam met ons te werk terwyl ons ‘n land probeer skep wat energie-doeltreffend is.”
Gigaba sê Suid-Afrikaners en sakegemeenskappe moet saamkom om die veldtog te ondersteun.
“Ons is vandag hier om ‘n beroep op hierdie gemeenskap te doen om by ons aan te sluit in ons strewe om hierdie vennootskappe te versterk en ons te help om die land se ligte aan te hou.”
Hy het inwoners gevra om eenvoudige wenke te volg om elektrisiteit te bespaar, soos om energie-besparende gloeilampte te gebruik en om toestelle wat nie gebruik word nie af te skakel.
– Volg Nuus24 op Twitter
- SAPA
