Gholfkarretjie ís ’n motor; fonds moet dus opdok
2010-08-07 07:00
Beeld
’n Gholfkarretjie ís ’n motorvoertuig.
Dus kan mev. Daphne Carol Berry van Centurion, wat op ’n hospitaalperseel as voetganger glo deur ’n gholfkarretjie beseer is, slegs skadevergoeding eis van die Padongelukkefonds (POF).
Dít blyk uit ’n uitspraak deur waarnemende regter James Goodey gister in die hooggeregshof in Pretoria.
Berry (38), van Lyttelton Manor, was luidens hofstukke op 1 Maart 2001 op die perseel van die Unitas-hospitaal in Centurion toe ’n battery-aangedrewe gholfkar met ses sitplekke teen haar gebots het.
’n Werknemer van SPE Security Patrol Experts BK van Roodepoort het die kar bestuur.
Luidens haar hofstukke het sy onder meer skaafplekke op haar linkerhand en -heup opgedoen; kry sy folterende laerugpyn, ernstige spierspasmas in die rug en ly sy aan post-traumatiese stres.
’n Skroef wat in ’n vorige operasie in haar rug ingeplant is, het glo weens die ongeluk gebreek.
SPE Security Control Experts se verweer was dat enige skadevergoedingseis wat Berry weens die botsing kan hê slegs teen die POF kan wees en dat sy van geen ander party kan eis nie.
Die POF (die tweede verweerder) se verweer was dat die battery-aangedrewe gholfkar nié kragtens wetgewing ’n motorvoertuig is nie en dat die fonds daarom nie aanspreeklik is vir enige verlies of skade nie.
Goodey het gesê ingevolge die Wet op die Padongelukkefonds is ’n motorvoertuig enige voertuig wat ontwerp of aangepas is om aangedryf of gesleep te word op ’n pad deur middel van brandstof, gas of elektrisiteit.
Dit sluit ’n sleepwa, woonwa en landbou- of enige ander werktuie in wat ontwerp of aangepas is om deur so ’n voertuig gesleep te word.
Goodey moes bevind of die karretjie (shuttle) in die saak ’n motorvoertuig is.
Hy het bevind die voorval het plaasgevind op ’n pad, naamlik die parkeerterrein van die Unitas-hospitaal.
Hy het gesê hy is gevolglik van mening dat soortgelyke voertuie wat by hotelle, lughawens, winkelkomplekse en hospitale gebruik word, motorvoertuie is.
Luidens Berry se hofstukke wil sy R6,52 miljoen skadevergoeding hê.