Geweld ruk handuit
2010-06-02 07:04
Khayelitsha – Die ANC-jeugliga het gister sy dreigemente oor die toiletfiasko uitgevoer, brande gestig en klippe gegooi.
Die streeksekretaris van die ANC-jeugliga, mnr. Luyiso Mkuhle, en sewe ander betogers is deur die polisie in hegtenis geneem in verband met klagte van openbare geweld.
Al agt het vlugtig in die landdroshof hier verskyn. Hulle bly tot môre in aanhouding vir ’n verdere hofverskyning.
Terwyl betogings waaraan honderde mense deelgeneem het gister erg buite beheer geraak het, is gedreig dat elke motor wat verbyry aan die brand gesteek sal word. Daar is ook gedreig dat petrolbomme gegooi sal word.
Intussen is die veiligheid rondom die burgemeester, mnr. Dan Plato, opgeskerp. Die speaker van die Kaapse stadsraad, mnr. Dirk Smit, het gister bevestig hy het daarop aangedring dat meer veiligheidspersoneel ontplooi word om Plato te beskerm.
Plato het gister berigte ontken dat hy gesê het mense moet klippe gooi en buitebande brand. Hy het gesê hy is uit konteks aangehaal ná ’n nuuskonferensie Maandag. Hy het sy woorde herhaal dat protes eerder teen die ANC-jeugliga se optrede gerig moet wees.
Verkeer is reeds vroegoggend tot stilstand gedwing toe betogers bande op die Mewweg-brug aan die brand gesteek en op die N2-snelweg gegooi het.
Uit vrees vir die veiligheid van motoriste is dié besige pad in spitsverkeer gesluit en die verkeer ure lank vertraag.
Die polisie het rubberkoeëls op die betogers gevuur om die situasie te ontlont. Hierna het sporadiese voorvalle op Baden Powell-rylaan tussen Mew- en Lansdowne-weg veroorsaak dat die polisie hulle hierheen moes haas.
Betonblokke en brandende bande is oor die pad gesaai en die verkeer is verder versper.
Sowat 150 polisiebeamptes is tussen Baden Powell-rylaan en die N2 by die voetoorgang tussen die R300 en Mew-weg ontplooi om enige verdere voorvalle van geweld te keer.
Betogers het ook verkeer in die rigting van Kaapstad met klippe bestook.
’n Polisievoertuig se ruit is onder meer uitgegooi, het kapt. Anneke van der Vyver, polisiewoordvoerder in Khayelitsha, gesê.
Pantservoertuie moes later in die informele nedersettings ingestuur word.
Verskeie ander paaie hier is ook deur betonblokke en brandende rommel en bande versper.
Walter Sisulu-rylaan het die ergste deurgeloop.
- Die Burger
Volg Nuus24 op Twitter
- Die Burger