Gewapende rooftog ruk Kovsies
2011-08-08 07:04
Bloemfontein - ’n Gewapende rooftog op ’n vroue-student en haar vriend op die Bloemfonteinse kampus van die Universiteit van die Vrystaat (UV) het die universiteitsgemeenskap geruk.
Jana Marx (21), ’n teologiestudent in haar derde jaar, en haar vriend, Charl van Niekerk (25), het voor haar koshuis, Roosmaryn, in Van Niekerk se motor gesit en koffie drink toe twee mans aan die motor se venster klop.
“Ons het gedink dit is die sekuriteitswag wat aan diens is, en het die deur oopgesluit,” het Marx Sondag aan Volksblad gesê.
Volgens Marx het die tweede man na die ander kant van die motor gegaan en albei het aangedring op geld en selfone.
“Albei was jonk en netjies geklee. Hulle was baie op hul senuwees en het gelyk of hulle nie gesout is in wat hulle besig was om te doen nie.”
Marx sê daar het ’n motor van voor af gekom en die twee mans het bo-oor haar en Van Niekerk gelê.
“Hulle het gedreig om ons te skiet as ons lawaai en probeer aandag trek. Hulle het Charl se selfoon, beursie en motorsleutels gevat.”
Die twee mans is toe, na verneem word, na die ander motor en wou dit glo kaap.
Nóg ’n inwoner van Roosmaryn, Carine de Villiers (21), was in dié motor. Die rowers is sonder sukses vort.
Lacea Loader, UV-woordvoerder, het by navraag gesê die UV is “geskok” oor die voorval omdat daar lanklaas ’n geval van geweldsmisdaad op die kampus was.
“Daar was 37 sekuriteitswagte aan diens. Soos normaalweg was daar een wag by Roosmaryn.”
Die voorval het Woensdag omstreeks 22:30 plaasgevind.
Loader sê die getal wagte by die koshuis is kort ná die voorval tot vier verhoog.
Sy sê die waghuis by die Roosmaryn-hek sal nader aan die hek geskuif word en niemand sal na-ure sonder ’n studente- of personeelkaart die voetgangerhek mag gebruik nie.
Volgens Loader het die slagoffers trauma-berading gekry en het die rektor, prof. Jonathan Jansen, briewe aan die ouers gestuur waarin hy die voorvalle betreur en verskerpte sekuriteitsmaatreëls aankondig.
Marx sê nie sy of haar ouers het só ’n brief ontvang nie.
Hulle het wel berading ontvang.
Loader sê ligte is aangebring op plekke wat nie goed verlig is nie.
“Daar is ook rooi pale met sekuriteitskameras en ’n paniekknoppie op strategiese plekke regoor die kampus aangebring. Die koshuise op die Bloemfontein-kampus word as van die veiligste in die land beskou,” het Loader gesê.
Volg Nuus24 op Twitter.
- Volksblad