Gewapende roof by Linksfield-hospitaal
2011-03-28 21:00
Johannesburg – ‘n Onbekende hoeveelheid geld is Maandagoggend tydens ‘n gewapende roof by die Netcare Linksfield-hospitaal gesteel, het die polisie gesê.
“Drie mans het vanoggend by die hospitaal ingestap en gevra om ‘n dokter te sien,” het kapt. Phillip Maganedisa, polisiewoordvoerder, gesê.
Die mans het glo vir ‘n vroulike werker van die hospitaal gewag wat daagliks geld by die apteek afhaal en dan later gaan bank.
“Met die vrou se aankoms by die hospitaal omstreeks 09:00 het een van die mans ‘n vuurwapen uitgehaal en aangedring dat die vrou die geld aan hom oorhandig,” het Maganedisa gesê.
Die mans het op die vlug geslaan.
Die veiligheidswagte by die hospitaal het dadelik die polisie gekontak.
Netcare was nie dadelik vir kommentaar beskikbaar nie.
Volg Nuus24 op Twitter.
- SAPA