Gevreesde siekte deur muskiete oorgedra
2010-04-06 06:25
Vicus Bürger, Die Burger
Kimberley - Kommer bestaan oor die verspreiding van slenkdalkoors deur muskiete nadat minstens drie mense die afgelope tyd aan dié siekte gesterf het sonder dat hulle met vee in aanraking was.
’n Vyftienjarige skoolseun van Kimberley is die nuutste slagoffer van slenkdalkoors in die Noord-Kaap. Hy het Sondag gesterf nadat hy baie vinnig siek geword en daarna in ’n kritieke toestand in die waaksaal van die Kimberley-hospitaal was.
Boonop is Jimmy Müller, ’n geliefde inwoner van Boshof, skielik aan slenkdalkoors dood.
Sy vrou, Anita, vermoed die siekte is deur ’n muskiet aan hom oorgedra, want hulle woon op die dorp en haar man het nie kontak met vee gehad nie.
Dr. Cloete van Vuuren van die departement interne geneeskunde aan die Universiteit van die Vrystaat (UV) en hoof van interne geneeskunde van 3 Militêre Hospitaal by Tempe in Bloemfontein, sê muskiete speel ’n rol in die verspreiding van die gevreesde slenkdalkoors waaraan reeds verskeie mense gesterf het.
Hy verduidelik dat daar tussen 1974 en 1976 ’n groot uitbraak van slenkdalkoors in Suid-Afrika was.
Sogenaamde vloedwaterbroeiende muskiete het toe eiers op die vloedwaterlyn gelê.
Serdertdien het die water egter nie genoeg gestyg vir die eiers om uit te broei nie.
Die onlangse baie reën het die watervlakke genoeg laat styg vir die eiers om nou uit te broei.
Van Vuuren sê wanneer die muskiete ’n dier besmet, kan enige ander muskiet wat dan aan die betrokke dier teer, ook met slenkdalkoors besmet word en dit aan ander diere en selfs mense oordra.
Volgens hom speel ander faktore ook ’n rol. “Mense het ’n droë seisoen verwag. Gevolglik is diere nie teen slenkdalkoors ingeënt nie.”
Van Vuuren sê as ’n voorsorgmaatreel kan mense middels soos Tabard en Peacefull Sleep aan hul lywe smeer.
Mense kan slenkdalkoors ook opdoen deur kontak met bloed en ander liggaamsvloeistowwe wanneer siek diere geslag of hul rou melk gedrink word.
Dr. Louis van Rooyen, adjunk-direkteur van veeartsenydienste in die Vrystaat, het vroeër aan Die Burger gesê met kouer weerstoestande sal die muskietlading daal en die gevalle van slenkdalkoors verminder.
Müller is op Maandag 29 Maart oorlede. “Die vorige aand het hy gesukkel om asem te haal, van gewrigspyne gekla en blou om sy mond geword,” het sy vrou gesê. Hy het later inwendig gebloei en “met ’n spoed” verswak en sy hart het drie keer gaan staan.
* Die Springbok-flank Juan Smith het bevestig dat sy pa aan slenkdalkoors ly.
- Die Burger