Gevangenes se woede kook oor in tronk
2011-11-08 08:07
Oproerige gevangenes het gisteroggend ’n brand in die Grootvlei-tronk by Bloemfontein begin.
Verhoorafwagtende aangehoudenes is glo ontevrede oor dié oorvol tronk en omdat hulle glo nie regsverteenwoordiging het nie. Die gevangenes kla ook hulle is deur polisielede aangerand toe hulle in hegtenis geneem is, sê Mamosa Kgaile, waarnemende areakommissaris van Grootvlei.
Volksblad het vertroulik verneem die gevangenes weier ook om hof toe te gaan.
Kgaile sê tussen 08:30 en 09:30 het ’n brand in ’n sel met sowat 80 aangehoudenes ontstaan nadat van hulle glo gordyne aan die brand gesteek het.
’n Ingeligte, wat verkies om anoniem te bly, sê ’n kantoor in die tronk het ook erg gebrand. Van die gevangenes het na bewering sleutels by lede van korrektiewe dienste afgevat, maar die ingeligte is nie seker of dit die kantoor se sleutels was nie.
Die polisie is na Grootvlei ontbied en ’n omstander op Grootvlei se terrein kon skote binne die tronk hoor klap toe traangas geskiet is. Ambulanse en reaksievoertuie het ook opgedaag.
Kgaile het gesê gisteroggend se gebeure was niks ernstigs nie en niemand is beseer nie.
Weens die oproerigheid kon sewe aangehoudenes egter nie na die hof gebring word nie.
Kgaile het erken die tronk is oorvol.
Volgens haar het hulle griefskrifte van die gevangenes ontvang, maar die klagtes is nou net beweringe. Dit word ondersoek en volgens haar werk korrektiewe dienste, die Nasionale Vervolgingsgesag (NVG), die departement van justisie en die polisie saam om probleme op te los.
Volgens die ingeligte is van die aangehoudenes oproerig, want hulle wil nie hof toe gaan nie. Hulle is glo ook ontevrede oor verhore wat tot volgende jaar uitgestel is.
Hy sê die gevangenes is al geruime tyd ontstoke. Volgens hom was die polisie Vrydag ook by die tronk toe van die aangehoudenes oproerig geraak het.
Teen gistermiddag laat was die polisie nog by die tronk, maar volgens alle aanduidings was die gevangenes rustig.
– Volg Nuus24 op Twitter.
- Volksblad