Gevangene skiet bewaarder, ontsnap
2010-12-13 19:13
Kaapstad – ‘n Gevangene het ontsnap nadat hy Maandag ‘n tronkbewaarder in Port Elizabeth se Livingstone Hospitaal geskiet het, het die Oos-Kaap se departement van gesondheid gesê.
Volgens woordvoerder Sizwe Kupelo het die opsigter die gevangene na die hospitaal gebring om x-strale te laat neem.
Die gevangene het glo gevra of hy die badkamer kan gebruik en het kort daarna wéér gevra of hy kan gaan.
Die tweede keer het hy die bewaarder gevra om sy boeie los te maak.
“Daar word beweer dat hy die bewaarder daarna geskiet het met ‘n geweer wat in die hospitaal ingesmokkel en in die badkamer gelos is,” het Kupelo gesê.
Die gevangene het glo met die hulp van medepligtiges wat in ‘n motor op die hospitaalgronde gewag het ontsnap.
Die tronkbewaarder is in sy bekken, maag en rug gewond en is in ‘n stabiele toestand by Livingstone, het Kupelo gesê.
Dit was die derde skietery by die hospitaal die afgelope jaar en die departement is bekommerd oor die pasiënte en personeel se veiligheid.
Hulle beplan om geslote kameras en metaalverklikkers te laat inrig.
Volg Nuus24 op Twitter
- SAPA