Gevangene kry vyf A's vir matriek

2013-01-06 08:31

Johannesburg – ‘n Durbanse gevangene het sy matriek-eksamens met vyf onderskeidings geslaag, lui ‘n mediaberig.

Sunday Times berig 42 gevangenes landwyd het verlede jaar se eksamens geslaag, terwyl Chris Mazibuko van die Westville-gevangenis die top-tronkstudent was. Hy het ‘n gemiddeld van 79,25% behaal.

Mazibuko meen dis nie ‘n maklike taak om agter tralies te studeer en eksamens te skryf nie.

“Die omgewing verg baie inspanning. Ons het ‘n paar bende-onderonsies gehad wat ons klasse in Julie ontwrig het.” 

“Die selle is vol en dis soms baie moeilik om te studeer,” het hy aan die koerant gesê.

Mazibuko (23) het ‘n A vir Zoeloe, Engels, Lewensoriëntering, Sakestudies en Ekonomie gekry. Hy het 61% vir Rekeningkunde behaal, maar Wiskunde met 28% gedruip.

Die gevangene is in 2006 in hegtenis geneem nadat hy en ‘n vriend by ‘n rooftog betrokke was.

Hy het aan die koerant gesê hy sal sy prestasies op 'n goeie manier gebruik wanneer hy volgende maand op parool vrygelaat word.

Volg Nuus24 op Twitter   

- SAPA