Gevaarlike Kotzé het '’n onvolwasse ego'
2012-01-09 07:00
Limpopo – Hy sal beslis weer iemand seermaak.
Só meen dr. Micki Pistorius, ’n forensiese sielkundige van Pretoria, oor Johan Kotzé (50) van Modimolle wat glo drie tuinwerkers gedwing het om ’n vrou te verkrag en sy stiefseun doodgeskiet het.
Pistorius is ook ’n kriminoloog en was jare hoof van die polisie se ondersoekgerigte sielkunde-eenheid.
Kotzé het Dinsdag sy stiefseun, Conrad Bonnette (19), koelbloedig in sy huurhuis in Modimolle doodgeskiet.
Hy is steeds voortvlugtig.
Die mans wat hy as tuinwerkers gehuur het en glo die vrou om die beurt laat verkrag het, is ook nog nie aangekeer nie.
Die feit dat Kotzé op Oujaarsaand na die Maroela Lodge in Modimolle is om die vrou “af te loer” dui op ’n onvolwasse ego, het Pistorius gesê.
“Hy is duidelik ’n uiters gevaarlike persoon en het beslis die potensiaal om weer so wreed op te tree.”
Brig. Hangwani Mulaudzi, kommunikasiehoof van die polisie in Limpopo, het gesê die Valke is by die ondersoek na Kotzé betrek.
Volgens hom word sterk leidrade opgevolg. “Sy dae is getel,” het Mulaudzi verklaar.
Hy het gesê Kotzé gewapen en het die publiek gewaarsku om versigtig te wees indien hulle hom sien.
Kotzé het in ’n wit Toyota Fortuner (DCS 392 FS) gevlug.
Enigiemand met inligting kan kol. Mabisela Mohale bel by 082 565 8606.
– Volg Nuus24 op Twitter
- Beeld