Getuies in duister oor wapenkommissie
2013-01-19 09:40
Johannesburg – Getuies wat oor minder as twee maande voor die Seriti-kommissie moet verskyn, weet steeds nie wat tydens hul verskyning van hulle verwag gaan word nie, het Beeld Saterdag berig.
Getuies het volgens die koerant gesê hulle is verlede jaar per brief in kennis gestel dat hulle sal moet getuig, maar nie een van hulle het intussen weer van die kommissie gehoor nie.
Die Seriti-kommissie is aangestel om die omstrede wapenskandaal te ondersoek.
“Die kommissie het gesê ek sal later in kennis gestel word van die aspekte waaroor ek moet getuig,” het dr. Richard Young, een van die onsuksesvolle tenderaars in die wapentransaksie, volgens die publikasie gesê.
“Ek het gesê ek het minstens vier maande nodig om voor te berei. Hulle het gesê ek sal in die eerste week van Januarie ingelig word. Die verhore begin op 16 Maart en ek het nog niks gehoor nie.”
Terry Crawford-Browne, wapentransaksie-aktivis, het gesê ook hy is in die duister oor die besonderhede van die verhore.
Hy het gesê hy is nie seker waarom dit lyk of die kommissie nie vordering maak nie.
Die DA-LP David Maynier, nog ’n getuie, het op sy beurt gesê hy is ook nog nie gekontak sedert hy gehoor het hy moet verskyn nie.
Die integriteit van die kommissie was vroeër die week onder ernstige verdenking nadat ‘n bedankingsbrief van een van sy ondersoekers uitgelek het.
Norman Moabi, ‘n prokureur en voormalige waarnemende regter van Pretoria, het in sy brief beweer dat die kommissie nie deursigtig is nie, en ‘n alternatief of “tweede agenda” verskuil.
Moabi het in die brief, wat aan regter Willie Seriti geadresseer was, gesê dat hy uittree as gevolg van inmenging en omdat hy vertroue in die kommissie se werk verloor het.
“Ek het na die kommissie gekom om met integriteit, waardigheid en waarheidliewendheid te dien. Ek kan nie met ’n skoon gewete voorgee dat ek blind is vir wat by die kommissie aan die gang is nie.”
– Lees hier meer.
– Volg Nuus24 op Twitter.
