Getroude onnie geskors oor verhouding met seun
2012-12-14 14:54
Johannesburg – 'n Hoërskool in Mafikeng het 'n onderwyseres geskors wat na bewering 'n seksuele verhouding gehad het met 'n 16-jarige skoolseun, het die skool se beheerliggaam Vrydag gesê.
"Die beheerliggaam stem saam met die aanbeveling van die tugpaneel dat die 37-jarige onderwyseres summier geskors moet word," het Lesiba Moses Kgwele, voorsitter, gesê.
Hy het gesê die onderwyser, wat getroud is, is aangekla omdat sy 'n onvanpaste verhouding gehad het met die leerder en dit nie aan ouers of die skoolhoof bekend gemaak het nie.
Die onderwyser is Dinsdag ingeroep vir 'n tugverhoor, maar het 'n bedankingsbrief, wat 10 Desember gedateer is, ingedien.
"Die beheerliggaam het haar bedankingsbrief verwerp," het Kgwele gesê.
"Ons is van mening dat die bedankingsbrief 'n poging was om dissiplinêre optrede te ontduik."
Hy het gesê die seun se ma het op 20 Oktober 'n klag ingedien nadat sy op skokkende inligting op die seun se selfoon afgekom het.
"Ons het ingestem om die tugproses uit te stel sodat dit nie die leerder se eksamen en die nasien van vraestelle deur die betrokke onderwyser beïnvloed nie."
Kgwele het gesê die beeldmateriaal wat op die seun se selfoon gevind is, was genoeg vir hulle om die onderwyseres skuldig te bevind en af te dank.
"Ons is vol vertroue dat ons saam met die ouer in die beste belang van die leerder opgetree het, omdat hy gr.10 geslaag het en volgende jaar na gr.11 sal vorder."
Kgwele het 'n beroep op ouers gedoen om te kyk wat op hul kinders se selfone gestoor is en met wie hulle op sosiale netwerke soos Facebook en MXit kommunikeer.
– Volg Nuus24 op Twitter
- SAPA
