Gestremde los studie oor ‘dosente nie help’
2010-03-10 09:24
Alet Rademeyer, Beeld
Johannesburg - ’n Gesiggestremde student aan die Universiteit van Pretoria (UP) moes sy studie in elektroniese ingenieurswese verlede maand staak omdat sekere dosente glo nie bereid was om hom met studiemateriaal te help nie.
Sakkie Mentz (25) het sy LLB-graad verlede jaar aan die UP verwerf en met ’n gemiddelde van 65% geslaag.
Sy droom is om eendag ’n patente-prokureur te word, maar dis nou eers van die baan omdat hy te ver agter geraak het met sy studie. Hy het nou maar vir sy LLM ingeskryf.
Mentz het Dinsdag gesê hy het al die beskikbare kanale by die universiteit gevolg in die hoop dat ’n beleid neergelê kan word om mense soos hy te help.
Hy het ’n doktersbrief ingedien wat sy gestremdheid bevestig het, het hy gesê. “Ek het gehoop dosente sou bereid wees om my te help met notas wat ek nie tydens die lesings kan afskryf nie.”
Volgens Mentz het hy veral probleme in vakke soos chemie en calculus ondervind.
Hy het met die hulp van medestudente op datum probeer bly, maar dit was nie moontlik nie. “Buitendien is dit nie hul ‘werk’ om my te help nie.
Ons betaal duur vir ons studies en verwag dat dosente ons behulpsaam moet wees. Ons dra immers by om hul salarisse te betaal.”
Mentz, wat vroeër ook ’n SR-lid was, het gesê wat hom betref het die universiteit nie ’n behoorlike beleid vir gestremde studente nie.
“As jy nie ’n dosent het wat bereid is om jou te akkommodeer nie, is jy op jou eie. Ek beskou myself nie as stroomop of dwars nie.
“Ek het met mense probeer praat, maar in sommige gevalle kon ek net sowel met ’n muur gepraat het.”
Victor de Castro, ook ’n gesiggestremde student, het beaam heelparty gestremde studente sukkel om studiemateriaal soos transparante te kry wat tydens lesings gebruik word.
Hy het eers politiek gestudeer en is ook nou met sy LLB besig. “Ek kan egter glad nie kla nie en is dankbaar vir dosente wat vir my goed is en my ekstra tyd gee en help dat my toetse in groter druk beskikbaar is.”
Prof. McGlory Speckman, studentedekaan, het gesê die universiteit het ’n eenheid vir gestremde studente en Mentz moes voordat hy begin studeer het, reëlings deur dié eenheid getref het wat sou help dat hy kry wat hy nodig het.
Luidens die UP se verklaring het Mentz nie by die klaskoördineerder in chemie opgedaag vir hulp nie. “Alle studente is self verantwoordelik om opsommings van lesings en handboeke te maak indien hulle van opsommings af wil werk.
“Die betrokke student is herhaaldelik genooi om die dosent te spreek oor handboekgebruik, wat hy nie gedoen het nie.”
- Beeld