Gesteelde kind ná 13 jaar met ouers herenig
2012-01-26 09:02
Port Elizabeth – Hy gaan al 24 jaar deur die lief en leed van polisiewerk.
Maar níks vergelyk met dít wat kapt. Sandla Dlilisa gevoel het toe hy ’n gesteelde kind ná 13 jaar met haar ouers herenig het nie.
“Ek sê dit sonder om skaam te wees: Ek het gehuil, die ouers het gehuil en die kind het gehuil. Al die ou vroue van die gemeenskap was daar en hulle wou my nie toelaat om te ry nie voordat hulle gebid en God gedank het.
“Dis ’n oomblik wat ek nooit sal vergeet nie,” het ’n steeds emosionele Dlilisa Woensdag aan Volksblad vertel.
Die skok-verhaal begin in 1998 toe ’n familielid van Nokonga Ndaza, inwoner van Centani, by haar aangekom het met die versoek dat sy haar ses maande oue babadogtertjie wil vat om vir die ouma te gaan wys.
Ndaza het die kind goedertrou laat gaan, maar later besef haar kind is gesteel. Sy en haar man, Thembinkosi Ndaza, is polisie toe, maar die saak is nooit behoorlik ondersoek nie.
Volgens Dlilisa het hulle daarmee vrede gemaak dat hul kind vir moetie-doeleindes gesteel is – tot in April verlede jaar toe me. Ndaza die vermeende kinderdief in Oos-Londen raakgeloop het.
Lede van die gemeenskap het haar gehelp om die verdagte aan te keer en aan die polisie uit te lewer.
Dlilisa sê die verdagte het gebieg dat sy die kind twee maande ná die diefstal in ’n stuk veld buite Durban gelos het.
Maatskaplike werkers het haar op die ouderdom van agt by peetouers in Pietermaritzburg geplaas.
Dlidliza het hulle opgespoor en toe bloedmonsters van die kind en die biologiese ouers geneem.
Nadat die uitslae getoon het hulle is sonder twyfel bloedfamilie, het die polisieman ’n hofbevel verkry om haar onder die sorg van haar familie te plaas.
Hy het haar Dinsdag met hulle herenig.
Volgens hom was sy én haar ouers baie senuweeagtig oor die herontmoeting, maar het alles goed afgeloop.
“Haar grootmaakouers het haar met ’n blye hart en ’n glimlag laat gaan. Hulle gaan beslis kontak hou en sy sal selfs gaan kuier.”
Die verdagte, Nolitha Siphondo, het reeds in die hof verskyn en bly in aanhouding.
Volg Nuus24 op Twitter
- Volksblad