Gesondheid van duisende in O-Kaap in gedrang
2011-11-18 11:10
Oos-Kaap – Die gesondheid van duisende pasiënte wat in die Chris Hani-distrikmunisipaliteit in die Oos-Kaap woon, is in gedrang weens 'n erge tekort aan medikasie.
Verpleegsters het aan The Herald gesê daar is 'n tekort aan medisyne.
"Dit is 'n groot krisis en dit is frustrerend. Sommige pasiënte het uit desperaatheid selfs die presidensiële hulplyn gebel," het 'n verpleegster gesê.
"Ons het nie bloeddruk-medikasie nie, en as pasiënte nie dié medikasie kry nie, kan hul harte vergroot. Dít kan lei tot komplikasies en selfs hartversaking. Ek ken pasiënte wat op hul sterfbed is."
Die departement van gesondheid blameer egter die verpleegters omdat die voorraad nie reg bestuur word nie.
Verskeie klinieke in Queenstown het verlede maand 'n tekort aan medikasie gehad. Besoeke aan gesondheidssentrums in die Emalahleni-munisipaliteit, wat Dordrecht, Lady Frere en Indwe dek, was weens 'n ernstige tekort aan medikasie by sommige klinieke op die randjie van ineenstorting.
Dr. Siva Pillay, superintendent-generaal van die departement van gesondheid, het gesê in sommige gevalle het die onbevoegdheid van kliniekbestuurders die probleme veroorsaak. Hy het gesê daar is ook tye wat die medikasie nie beskikbaar was by die verskaffers nie.
Sizwe Kupelo, woordvoerder van die departement van gesondheid, het gesê rekords toon dat die medikasie by die Mthatha-depot beskikbaar was.
– Volg Nuus24 op Twitter
- SAPA