Geskorstes kry R72 miljoen
2010-09-07 08:18
Johannesburg - Meer as ’n jaar sedert sowat 1 000 soldate met verpligte verlof huis toe gestuur is nadat hulle na die Uniegebou opgeruk en die polisie op hulle geskiet het, het die groep reeds nagenoeg R72 miljoen aan salarisse verdien – sonder om ’n vinger te verroer.
Hulle het boonop in Desember saam met die res van hul werkende kollegas die yslike verhogings van minstens 60% ontvang waaroor hulle betoog het, terwyl hulle met betaalde verlof was.
As dié soldate in die eerste plek in ’n spesiale militêre hof dissiplinêr vervolg is, sou die saak maande gelede reeds afgehandel gewees het, het adv. Pikkie Greeff van die Suid-Afrikaanse Nasionale Weermagunie (Sanwu) gister gesê.
Nou sloer die proses al 12 maande.
Die regsargument in die saak is nie meer of die soldate skuldig was aan wangedrag nie, maar of die afdankingsproses wat me. Lindiwe Sisulu, minister van verdediging gevolg het, wettig was.
Selfs ná die hofuitspraak sal die soldate dus “onskuldig” wees omdat dit niks met hul gedrag te make het nie, het Greeff gesê.
“Sisulu het eerder as om ’n militêre regsproses te volg besluit om al die soldate summier af te dank.
“Nou is die saak eers vir die tweede week in November op die Pretoriase hooggeregshof se rol geplaas.
As die hof die vakbond gelykgee dat die proses onwettig was, gaan ’n rits siviele eise boonop waarskynlik teen die weermag ingestel word,” het Greeff gesê.
“Dan is 1 000 soldate se werktyd en salarisse meer as ’n jaar deur ondeurdagte optrede vermors.”
Die geskorste soldate het betoog oor soldate se swak salarisse.
Twee maande later het Sisulu die groot verhogings aangekondig.
Die geskorste soldate is hoofsaaklik infanteriste, die meeste van Zeerust, Middelburg (Mpumalanga), Mafikeng, Johannesburg en Pretoria.
Soldate moes tydens WB 2010 van die Wes-Kaap na Gauteng gebring word om in die geskorstes se plek sokkerbystand te lewer.
Tydens die staking die laaste tyd moes hul makkers bontstaan by hospitale terwyl hulle tuis sit.
- Beeld