Gesin wil minister dagvaar vir Dstv
2010-09-12 09:26
’n Gesin wat die afgelope 12 jaar op staatsonkoste beskerm word, wil die
minister van justisie laat opsluit omdat dié nie meer hul DStv-rekening
wil betaal nie.
X* en sy gesin is sedert Augustus 1998 in
die getuiebeskermingsprogram van die na-sionale vervolgingsgesag (NVG)
nadat sy huis afgebrand en hy daarna in die maag geskiet is toe hy dit
wou herstel. X beweer hy is die slagoffer van ’n politieke komplot en
dat ’n “onopgeleide geheime agent” hom teister.
Die NVG het X, sy
vrou en drie kinders egter in Oktober 2008 ingelig hy meen sy lewe is
nie meer in gevaar nie. Die NVG het hom gevra om aan te dui waar hy
hervestig wil word sodat onderhandelings oor ’n finale skikking kon
begin.
X skop egter hierteen.
Die NVG het nog nie ’n finale
besluit geneem nie, maar het die huurkontrak van X en sy gesin se
drieslaapkamerhuis hernieu. Die “maandelikse toelaag van R2 390” het
egter skielik opgedroog, sê X.
Nou het X die hooggeregshof in Pretoria gevra om die minister skuldig te bevind aan minagting van die hof.
X
eis voorts R2 520 vir agterstallige vervoertoelae, R6 479 vir
DStv-intekengeld, R5 608 vir skoonmaakmiddels en R750 vir die
behandeling van sy seun deur ’n tradisionele geneser. Nie X of sy vrou
werk nie.
Die minister betwis dit dat hy aanspreeklik is vir al
dié uitgawes en ’n verteenwoordiger van die NVG sê in hofstukke die
program is nie ’n “maatskaplike diens” nie, maar ’n beskermingsprogram
waarin hy vrywillig opgeneem is.
X meen egter die reëling oor die
DStv is reeds ’n dekade in werking en is nodig vir hul “fisieke en
verstandelike behoeftes”. Dit veroorsaak probleme as sy kinders die
heeltyd DStv by die buurman gaan kyk, sê hy.
X is bang sy ware identiteit lek uit as die bure sy kinders sou uitvra oor hul omstandighede.
“Ons is die afgelope tien jaar gratis vervoer na waarheen ons ook al wou gaan,” sê X, maar dié toelae is ook gestaak.
Sy
dogter kon dus nie eens ’n brief oor hul benarde situasie by pres.
Jacob Zuma se kantoor gaan aflewer nie, want hulle het nie vervoer nie.
Die hof sal die aansoek in November aanhoor.
* Die partye se identiteite en geografiese inligting word weerhou omdat hulle steeds beskermde persone is.
- Rapport