Gesin weer slagoffer van inbraak op hoewe
2011-10-24 08:01
Bloemfontein – ’n Bloemspruitse gesin het die afgelope naweek wéér die slagoffers van misdaad geword toe inbrekers by hul motorhuis ingebreek en duur gereedskap gesteel het.
Die voorval kom ’n week nadat die Bloemspruit-vroue-aksie-groep gestig is om vroue en ander slagoffers van misdaad in die Bloemspruit-omgewing te help. Dit is die tweede keer in amper soveel maande dat Ben Hanekom en sy vrou, Talane, besteel is.
Mnr. Hanekom het Sondag gesê hy vermoed dit is dieselfde mense wat hulle en ander inwoners van Bloemspruit in hul visier het.
Die booswigte het Vrydagaand by die Hanekoms se motorhuis ingebreek en sowat R10 000 se gereedskap gebuit. Die alarm het nie afgegaan nie.
Twee weke gelede het ’n man ook probeer inbreek, maar die hasepad gekies toe mev. Hanekom, die orrelis by die plaaslike NG kerk, hom gewaar het. Hy is deur die plaaswag aangekeer en aan die polisie oorhandig. ’n Paar dae later was hy weer op vrye voet nadat sy saak uit die hof gegooi is.
Twee maande tevore is ook by die Hanekoms se motorhuis ingebreek. Die inbrekers het ’n gat in die muur gemaak om so toegang tot die huis te verkry, maar het misluk. Hulle het toe met gereedskap gevlug.
“Ek is al gatvol. Ons word elke keer geteiken en die polisie doen niks. As ek hulle weer sien, gaan ek skiet. As die polisie nie iets gaan doen nie, gaan ek,” sê mnr. Hanekom.
Sy vrou loop sedert die laaste voorval met ’n rewolwer om haar heup uit vrees vir haar lewe. “Sy is bang en moet heeltyd met die rewolwer loop. Ons is almal op ons senuwees. As die alarm afgaan, hardloop ons. ’n Mens voel bedreig op jou eie plek.”
Sers. Thabo Litabe, polisiewoordvoerder, het nie gister van die voorval geweet nie, maar het beloof om inligting te kry.
Volg Nuus24 op Twitter
- Volksblad