Gesin verloor byna alles in brand
2011-12-31 08:54
Bloemfontein – ’n Bloemfonteinse gesin het ’n baie slegte Kersfees beleef en word in die gesig gestaar deur ’n nuwe jaar van onsekerheid nadat hul woonstel byna afgebrand het.
Heila Kotze (47), ’n private verpleër en koerantverkoper, se huurgeld wat onder die matras was, is ook in die brand vernietig toe haar tweeslaapkamer-woonstel in Oranjesig op Kersaand byna afgebrand het.
Kotze deel die woonstel met haar drie seuns, skoondogter en kleinkind.
Die Kotzes is sonder heenkome nadat hulle byna alles in die brand verloor het.
Volgens Kotze is die huurgeld van R3000 wat sy verloor het, die ergste. Sy moet dié geld voor 3 Januarie betaal.
Kotze het gesê die brand het omstreeks 22:00 ontstaan toe ’n gordyn vermoedelik vlam gevat het nadat haar seun Christo (17) ’n kers opgesteek het toe die krag afgegaan het.
Christo en Kotze se kleinkind, Nathan Lyons (3), was alleen by die huis.
Christo het Nathan gegryp en by ’n agterdeur uitgehardloop.
“Ek het gedog my kinders het doodgebrand. Ek het aan my broer se kinders gedink (wat in 1995 in brand dood is). Ek het gedink: ‘Here, hoekom moet dit met my gebeur?’”
Brandweermanne moes Kotze keer toe sy in die brandende woonstel wou inhardloop.
“Dit was nie ’n lekker Kersfees nie en ons toekoms lyk ook donker. Ons het alles verloor en het nie eens kos om te eet nie. Ek moet nou ’n plan probeer maak om die huur te betaal.
“Ons moet nou nog ander blyplek ook soek terwyl die skade reggemaak word, maar ons het geen ander heenkome nie.”
Twee rekenaars, ’n TV-stel, klere, beddegoed en ’n slaapkamerstel is in die brand vernietig.
Kotze moes ook al hul kos weggooi. Die plafon en mure van die woonstel is beskadig.
“Dié dinge gebeur, maar jy verwag nie dit gaan met jou gebeur nie.
“Ek is veral hartseer oor my rekenaar wat verwoes is, want dit het twee jaar gevat om dit op te bou,” het Albert Lyons (27), Kotze se oudste seun, gesê.
Kotze het die brandweer en nooddiens bedank vir hulle vinnige optrede.
Mense wat die gesin wil help, kan Kotze by 072-848-4671 bel.
– Volg Nuus24 op Twitter
- Volksblad