Gesin van Lindley vandag in een graf ter ruste gelê
2010-12-09 06:50
Volksblad
Lindley – Die Potgieter-gesin, wat wreed op die plaas Tweefontein in die distrik Lindley vermoor is, word vandag in drie kiste bo-op mekaar in een graf begrawe.
“Ons (die twee families) het besluit omdat hulle saam dood is, is dit net reg dat hulle ook saam begrawe word,” het André Potgieter gister op die vooraand van sy seun Attie (40), skoondogter Wilna (36) en kleinkind Willemientjie (2) se begrafnis gesê.
’n Gedenkdiens word om 11:00 in die NG kerk op Lindley vir die Potgieter-gesin gehou. Ds. Pikkie Maritz sal die diens lei. Hulle word hierna in die Lindley-begraafplaas ter ruste gelê. Ds. Piet Taljaard, wat die egpaar se predikant op Arlington was, gaan die teraardebestelling lei.
“As ons swaarkry net die mense van Suid-Afrika by God sal uitbring, dan was dít wat gebeur het nie vergeefs nie,” sê Potgieter.
Volgens hom koester die familie nie wraak of vergelding nie. “As daar net iets positiefs hieruit kan kom.
“Ek wéét môre (vandag) gaan swaar wees, maar God is met ons. Ons moet net regop bly.”
Potgieter het gesê hy het vrede en kalmte in sy hart.
“Die ondersteuning van die gemeenskap is ongelooflik.”
Die vermoorde man se broer, Arno, het gister gesê die begrafnis is soos ’n berg wat voor hom lê.
“Ek dink al die heeldag daaraan.”
Bokkie van Staden, Wilna se ma, was gister emosioneel en wou nie baie praat nie.
Sy het dié dag beskryf as een waarin hulle as familie “baie dinge moet afsluit”.
Vicus Bürger berig mnr. Johan van Tonder, streeksverteenwoordiger van Vrystaat Landbou (VL), sê die familie het gevra dat geen georganiseerde optredes deur politieke partye of verenigings gehou word nie.
“Dit is vir hulle ’n private aangeleentheid en hulle wil in vrede afskeid neem van hul kinders.”
Van Tonder sê baie mense het simpatie met die familie en hulle verwag dit gaan ’n groot begrafnis wees.)Die Vrystaatse premier, mnr. Ace Magashule, het gister gesê alle rolspelers moet bymekaarkom om oplossings vir die wrede aanslae op ons boere te vind.
Volgens hom kan die regering nie alleen misdaad bestry nie, maar almal, wit en swart, sal hande in dié stryd moet vat.
Hy het die aanvallers op die Potgieter-gesin as genadeloos beskryf en die moorde ten sterkste veroordeel.
Magashule het weer die regering se meegevoel met die oorledenes se familie uitgespreek.
Volg Nuus24 op Twitter.
- Volksblad