Gesin se bakkie wrak ná dit glo slaggat tref
2010-01-12 08:04
Johan Brits
Kroonstad – ’n Gesin van Lesotho se viertrekbakkie is ’n wrak ná ’n ongeluk op ’n stuk pad in die Noord-Vrystaat waaroor die Wes-Kaapse premier, mev. Helen Zille, sê “dit is soos om op die maan te loop” weens sy vreeslike slaggate.
Die provinsiale pad tussen Kroonstad en Bothaville is moontlik een van die swakste paaie in die provinsie.
Marietjie Taljaard van die plaas Kaalplaas het die gesin te hulp gesnel ná die ongeluk.
Die gesin was glo van Mafikeng waar hulle gekuier het, op pad terug na Lesotho toe die ongeluk plaasvind.
Die man en vrou, asook vier kinders wat agter in die bakkie was, is beseer, maar na verneem word nie baie ernstig nie.
Taljaard het nie hul besonderhede nie.
Die bakkie het vermoedelik ’n slaggat getref, waarna ’n band gebars het.
Die voertuig het glo minstens drie keer gerol.
“Dit is vreeslik. Ons wat hier in die omgewing bly, weet in watse toestand die pad is en om baie stadig en versigtig te ry. Mense van elders weet nie hoe die pad lyk nie.”
Die pad het al voorheen ongelukke veroorsaak.
Taljaard meen dis ’n skande dat die pad nie aandag kry nie.
Volksblad het self die pad besoek en dit in ’n verskriklike toestand aangetref.
Taljaard sê ná die onlangse reën is die pad “letterlik onbegaanbaar”.
Zille het dié pad verlede jaar voor die algemene verkiesing in haar hoedanigheid as DA-leier besoek.
“Ek het al gehoor van die gate in die pad, maar hier moes ek soek vir die pad tussen die gate. Dit is soos om op die maan te loop. Dit is lewensgevaarlik en veroorsaak talle ongelukke,” het sy ten tyde van haar besoek gesê.
Die gesin se name was teen druktyd nog onbekend.
- Volksblad