Gesin rou nadat seun sterf
2009-09-10 22:03
Sonja van Buul
Vanderbijlpark – “Ek het elke oggend so gesukkel om Brian wakker te maak en nou kan ek dit nie eens meer doen nie.”
So sê Vic Gertzen van Vanderbijlpark nadat sy jongste seun, Brian (22), Saterdag kort ná 21:00 in ’n motorongeluk in dié dorp dood is.
Brian en drie vriende het ’n vriendin in nood te hulp gesnel toe hy op ’n draai in Rossini-boulevard beheer oor hul voertuig verloor en teen ’n boom gebots het.
Brian, Gerhard Botes (20), Angie Ballantyne (21) en Saskia Sayers (15) was op pad na ’n partytjie van ’n vriend wat 21 geword het.
“Brian-hulle het vleis en ys vir ’n braaivleis gaan koop, toe die vriendin vir hulp bel,” het sy ma, Meisie, hartseer gesê.
Volgens Gertzen het sy seun altyd uit sy pad gegaan om ander te help.
“Dit het nou waarskynlik sy dood veroorsaak.”
Vriende en omstanders het geskok op die grusame ongelukstoneel rondgestaan terwyl ER24-paramedici vergeefs om Brian se lewe geveg het.
Die ouerige model Toyota Conquest waarmee die vriende gery het, behoort aan een van Brian se vriende.
Balantyne en Saskia is na die Vereeniging Medi-Clinic geneem waar hulle vir geringe beserings behandel is.
Botes is by die Sasolburg-hospitaal behandel en is ook nie ernstig beseer nie.
Volgens sy ouers was Brian lief vir rekenaars, skaak en motorfietse.
“Hy het altyd sy eie kop gevolg, maar hy was ’n getroue, behulpsame vriend in sy groot vriendekring,” het sy pa gesê.
Die ouers sal onthou hoe Brian, sonder hul toestemming, sy hoëtroustel verkoop het om mense te help wat nie hul munisipale rekening kon betaal nie.
“Dit is hoe Brian was.”
Benewens sy ouers word hy oorleef deur ’n broer, Shaun (26).
Hy word Vrydag om 14:00 vanuit die Maranatha-aanbiddingsentrum op die hoek van Bernini- en Bramatestraat in Vanderbijlpark begrawe.
Sy motorfietsvriende beplan om Brian met motorfietse na sy laaste rusplek te begelei.
–Beeld