Gesin betrap dronk inbreker op rusbank

2012-09-11 10:20

Johannesburg – ’n Inbreker het hom só aan sy slagoffer se drank vergryp dat hy op die rusbank aan die slaap geraak het waar die inwoners later op hom afgekom en hy op die toneel in hegtenis geneem is.

Beeld berig diewe het verlede week by Dennis Stastney se huis in Vereeniging ingebreek nadat hy en sy vrou hul kinders by die skool afgelaai en werk toe gegaan het.

“Dit lyk asof hulle heeldag ‘n massiewe partytjie gehad het... As ’n mens kyk na die hoeveelheid drank wat gedrink is, was hier meer as een inbreker,” het die man aan die dagblad gesê.

Die inbrekers het die huis deursoek en elektroniese items en juweliersware gesteel. Hulle het ook op die beddens en banke geurineer en selfs ‘n maaltyd geniet.

“Hulle het vyf bottels drank leeggedrink, waaronder ’n bottel brandewyn, ’n bottel whisky, ’n bottel rum, ’n halwe bottel wyn en vodka.”

Stastney (34) sê hy, sy vrou en twee kinders het omstreeks 18:00 weer by die huis aangekom en ‘n man op hul rusbank sien lê.

Hulle het Vereeniging se gemeenskaps­polisiëringsforum in kennis gestel en die polisie is ontbied.

“Hy (die inbreker) was vol drank en gom. Hy het gom gesnuif wat ek gebruik het om ons houtvloere mee in te sit.”

Stastny het die voorval as “skrikwekkend” beskryf aangesien die inbrekers duidelik die gesin se roetine geken het.

Volg Nuus24 op Twitter    

- SAPA