Gerugte oor "siek" Mandela is nie waar

2010-09-12 06:25

Erna van Wyk en Hanlie Retief

Johannesburg - ’n Katnes van gerugte oor oudpres. Nelson Mandela se gesondheid het die afgelope week in Slowenië gelei tot ’n diplomatieke verleentheid vir die Mandela-familie.

Die organiseerders van ’n glansgeleentheid in die Sloweense hoofstad, Ljubljana, vir hoofman Man­dla Mandela se kunsprojek, Africa Salutes You, is per e-pos ingelig dat Mandla nie die geleentheid kon bywoon nie “omdat sy oupa se gesondheid so versleg het dat Mandela-familielede aangesê is om nie die land te verlaat nie.” Hy is Madiba se kleinseun.

Africa Salutes You is ’n inisiatief van Mandla en die kunstenaar Athol Moult. Dis ’n WB 2010-projek waarin Moult en die kinders van Mvezo, Madiba se geboorteplek, kunswerke gemaak het wat deur Madiba onderteken is.

Mandla het gister ontsteld aan Rapport gesê hy sou nooit dié geleentheid in Slowenië bygewoon het nie. En dit is “absoluut onwaar” dat sy oupa ernstig siek is.

“My oupa is in goeie gesondheid. Sy humorsin het verouder, soos goeie wyn, soos wat hy ouer word. Hy word by die dag net snaakser. Niemand in my familie is aangesê om nie die land te verlaat nie.”

Die Nelson Mandela-stigting het ook gister bevestig Madiba se gesondheid is goed.

Sandra Brajko van die Moja Sanje-liefdadigheidsorganisasie het uit Slowenië aan Rapport gesê sy sal ontsteld wees as sy om die bos gelei is. Sy is deur Izandla Marketing in Suid-Afrika gekontak om die reëlings te tref vir Mandla se besoek.

Mandla sê: “Ek hoor nou die eerste keer dat ek veronderstel was om in Slowenië te wees. Ek weet nie wie sulke reëlings getref het nie.”

As LP het hy verpligtinge in die parlement gehad en vergaderings by Luthuli-huis in Johannesburg.

Brajko is verlede Donderdag in ’n e-pos van Izandla Marketing deur Thierry Leclair en Ross Calder ingelig Mandla kan nie meer reis nie weens sy oupa se gesondheid.

Volgens Brajko het Leclair Woensdagaand by die kunsprojek se uitstalling dieselfde gesê.

Leclair het gister net gesê “die mense wat Africa Salutes You bestuur” het hom oor Madiba ingelig, maar hy kon nie sê wie nie.

Moult het gesê hy is verlede week op kort kennisgewing deur Leclair gevra om vir Mandla in te staan.

Calder se naam verskyn onder dié van Leclair op die e-pos. Pogings om hom in die hande te kry, was onsuksesvol.

Calder en Ismail Ayob, Madiba se voormalige regsadviseur, is destyds deur Madiba gedagvaar oor kunswerke waarop sy handtekening glo vervals is.

Mandla was oorbluf toe Rapport hom inlig dat kunswerke by die uitstalling in Slowenië €5 000 (R46 200) ingevorder het.

“Ek het nie geweet daar is enigiets verkoop nie. Daardie geld moet na die koffers van die Mvezo-gemeenskap gaan sodat ons ’n hoërskool kan bou.”

Brajko wil nou dringend met Mandla praat: “Ek gaan nie die geld oorbetaal voordat ek self met hom gepraat het nie.

“Toe ek Leclair vra vir ’n ampte­like kopie van die bankbesonder­hede van die Mvezo-gemeenskaptrust is aan my gesê die geld kan nie direk na die trust gaan nie; dit moet eers in Izandla se rekening inbetaal word, want hulle het nog kostes wat afgetrek moet word voordat dit oorbetaal kan word.”

- Rapport