Geoloog in hof oor huurmoord
2011-11-19 08:30
Pretoria – 'n 62-jarige geoloog wat sy tuinier glo gehuur het om sy voormalige vrou te vermoor, het Vrydag in die hooggeregshof in Pretoria skuld ontken.
Die staat beweer Cobus Prinsloo het Lucas Moloi se dienste bekom om sy eksvrou, Cordelia, dood te maak.
Prinsloo het haar lyk glo op 14 Oktober 2009 gevind waar dit in ’n blombedding op sy hoewe naby Kameeldrift, noordoos van Pretoria, begrawe is.
Moloi is Donderdag tot 18 jaar tronkstraf gevonnis nadat hy erken het hy het mev. Prinsloo met ’n graaf doodgeslaan.
Sy verhoor is van Prinsloo s’n geskei nadat hy skuld beken het.
Moloi het ter strafversagting getuig Prinsloo het hom eers werk en gratis huisvesting aangebied en later belowe om hom R50 000 en ’n huis te gee om sy eksvrou te vermoor.
Hy het nie ’n sent van die beloofde geld gekry nie. Sy enigste beloning was R3 000, wat hy gekry het deur ’n Krugerrand van mev. Prinsloo te verkoop.
Die polisie het by sy arrestasie juwele, buitelandse geld, ’n skootrekenaar en selfoon by hom gekry.
Mev. Prinsloo, ’n lugwaardin, het ten tyde van haar dood in ’n afsonderlike huis op haar eksman se hoewe gewoon.
Mnr. Prinsloo het Vrydag sy swygreg gebruik en nie die grondslag van sy verdediging onthul nie, maar wel ’n aantal formele erkennings gedoen.
Hy het gesê die skikking in hul egskeiding het ’n ooreenkoms ingesluit dat die hoewe sy eksklusiewe eiendom sou bly, maar dat sy eksvrou geregtig sou wees op 4 ha van die hoewe, wat onderverdeel moes word.
Die ooreenkoms het ook bepaal hy sou haar die markwaarde van die 4 ha gee as die onderverdeling nie binne drie jaar afgehandel is nie.
Die onderverdeling het ten tyde van haar dood nog nie plaasgevind nie.
Regter Ntendeya Mavundla het die verrigtinge uitgestel tot Maandag, wanneer Moloi na verwagting sal getuig.
– Volg Nuus24 op Twitter
- Beeld