Genoeg is genoeg, sê AWB se nuwe leier
2010-04-07 07:20
Nicolize van der Walt, Die Burger
Ventersdorp-Die man wat Eugène Terre’Blanche se skoene voortaan as leier van die AWB sal moet volstaan, is gister hier aangewys.
Steyn von Ronge, ’n Vrystaatse boer uit die Zastron-omgewing wat reeds 20 jaar ’n lid van die AWB is, het die leisels amptelik oorgeneem. Dit kom ná ’n uitvoerende bestuursvergadering van die beweging.
Von Ronge het in ’n kort verklaring weer eens gesê die AWB sal nie verantwoordelikheid neem vir “individuele vergeldingsaksies” nie.
Hy het egter vinnig bygevoeg dat moorde op wit boere nie langer geduld sal word nie.
“Genoeg is genoeg. Ons is tans besig om nog veiligheidsplanne, binne die raamwerk van wetgewing, tot stand te bring. Ons kan egter nie die plan bekend maak nie,” het Von Ronge gesê.
Volgens hom is hulle tot dusver tevrede met die verloop van die regsproses ten opsigte van die vervolging van Terre’Blanche se vermeende moordenaars.
“Ons respekteer die landswette en glo en vertrou dit sal ’n regverdige proses wees.
“Ons is ook baie tevrede met ons lede se gedrag en optrede by die hof vandag.”
Hoewel die AWB weier om ledegetalle bekend te maak, het Von Ronge bevestig dat nuwe aansoeke om lidmaatskap “met duisende” toegeneem het.
* André Visagie, sekretaris-generaal van die AWB, het aan Hannatjie van der Merwe gesê dit sou vir die AWB in dié stadium sinloos wees om nie die moord te wreek nie, “aangesien die haat in die harte van ons mense hulle sal dwing om tot anargie oor te gaan”.
Visagie het daarop gewys dat Pieter Steyn, AWB-kommandant van die Wes-Rand, se uitlatings van eergister van alle waarheid ontbloot is.
Hy het gesê die AWB sal uiteraard teen Steyn optree.
“Steyn is nie ’n lid van die uitvoerende raad van die AWB nie en praat nie namens die AWB nie,” het Visagie gesê.
- Die Burger