‘Gelyk soos ’n normale gesin’
2011-10-15 07:16
Die vermeende Sondagverkragter se vrou het aan mense wat vroeër vandeesweek gevra het hoekom daar soveel polisiemotors by hul huis is, gesê dis omdat daar ’n inbraak was.
So het bure van die man wat hom eergister ná die moord op die 16-jarige Louise de Waal in Bergbron, Roodepoort, aan die polisie oorgegee het, gister gesê.
“Hulle het soos ’n doodnormale, gelukkige gesin gelyk,” het een van die bure gesê.
“Hulle het hulself maar eenkant gehou. Ons het nooit enige probleme met hulle gehad nie.”
Die netjies versorgde erf in Bergbron is net sowat 12,7 km van Rinastraat, waar Louise Woensdag op pad na die Hoërskool Die Burger ontvoer is.
Sy is vermoedelik verkrag en vermoor voordat haar lyk aan die brand gesteek is. Sy sou môre 17 geword het.
Die verdagte, wat na bewering minstens tien meisies ontvoer en twee vermoor het, mag regtens nie geïdentifiseer word voordat hy nie op die aanklagte teen hom gepleit het nie omdat dit deels van ’n seksuele aard is.
Bure het die man as ’n “maer, skaam outjie” beskryf en sy vrou as mooi en blond. Hulle het ’n sesjarige seuntjie en drie honde.
Van die bure het gesê die gesin het maar onlangs in die woonbuurt ingetrek.
Die huis was gister verlate.
“Die vrou het nog die eerste aand (Woensdagaand) hier geslaap, maar ek het die volgende oggend gesien hoe sy haar seuntjie in die motor laai en wegry. Sy was nog nie weer hier nie.”
Barney Lotter, adjunkhoof van Die Burger, het gesê sy skool is steeds in rou gedompel.
Die Burger funksioneer nou “min of meer normaal”, maar die saalopening eergisteroggend, die eerste nadat haar lyk gevind is, was “baie moeilik en emosioneel”.
Die skoliere sal aanhou om berading te ontvang “totdat dit beter gaan met Die Burger”.
Die voorval kan landwyd as ’n wekroep vir skole gesien word, meen hy.
Barbara Creecy, Gautengse LUR vir onderwys, het Louise se gesin gister besoek.
“Niks kan so ’n barbaarse misdaad verduidelik nie – daar is geen antwoorde nie, wat dit natuurlik vir die familie baie moeiliker maak om hierdie gebeure te verwerk,” het sy gesê.
– Volg Nuus24 op Twitter.
- Beeld