Geld rol in vir amptenare wat swak presteer
2012-10-16 15:03
Kaapstad – Senior bestuurders in die openbare sektor kos die staat sowat R4,1 miljard, en hulle verdien 'n gemiddeld van R811 235 per jaar.
Dié bestuurders verdien enorme salarisse terwyl hulle omsien na staatsorgane wat nie eens die helfte van die doelwitte wat gestel word, bereik nie, het die DA Dinsdag gesê.
Dié data is opgeneem in die 2011/12-jaarverslae vir nasionale regeringsdepartemente, het Kobus Marais, woordvoerder vir die DA, gesê.
"'n Ontleding van die beskikbare inligting oor werkverrigting in die onderskeie departementele jaarverslae toon dat nasionale regeringsdepartemente gemiddeld 96,5 persent van hulle begrotings spandeer het, maar slegs 52 persent van hulle doelwitte bereik het.
"Senior bestuurders word egter goed beloon vir dié middelmatigheid," het hy in 'n verklaring gesê.
Verslae toon dat R4,1 miljard op die salarisse van 4 279 permanente werknemers op topbestuurvlak (vlak 13 tot 16) spandeer is.
'n Verdere R378 miljoen is bestee op salarisse vir 450 kontrakpersoneellede in senior bestuursposisies. Die gemiddelde salarisse vir permanente senior bestuurders is R811 235, en R1,314 miljoen vir kontrakwerkers op topbestuurvlak.
Altesaam R41,13 miljoen is ook op prestasiebonusse vir senior bestuurders bestee.
"Ons kan nie voortgaan om swak werksverrigting in die openbare sektor te beloon nie," het Marais gesê.
– Volg Nuus24 op Twitter.
- SAPA
