Geld 'nie oorsaak van onderwysprobleme in SA'
2011-04-15 09:30
Kaapstad - Geld is nie noodwendig die oorsaak van die probleme in die Suid-Afrikaanse onderwysstelsel nie.
Verskeie onderwyskenners het Donderdag gesê swak onderwysresultate kan aan etlike ander redes toegeskryf word, waaronder die invloed van vakbonde en swak bestuur.
“Ons is geneig om eerste na die gebrek aan hulpbronne te kyk,” het dr. Vijay Reddy, hoof van navorsingsprogramme oor onderwys en vaardigheidsontwikkeling by die Raad vir Geesteswetenskaplike Navorsing, gesê.
“Hoewel daar steeds 300 plankie-skole in Suid-Afrika is, is daar sedert 1994 beslis ’n verbetering in infrastruktuur by skole.”
Angie Motshekga, minister van basiese onderwys, het Woensdag in haar begrotingstoespraak erken dat die hoeveelheid geld wat deur die regering aan onderwys bestee word, nie in die resultate weerspieël word nie.
Reddy het gesê Suid-Afrika is ’n jong demokrasie en omdat daar voortdurend aan die onderwysbeleid en die kurrikulum verander word, maak dit mense onseker.
Prof. Nan Yeld, onderwyskenner aan die Universiteit van Kaapstad, het swak bestuur die skuld gegee.
Sy voel daar moet meer geld aan die onderrig van gr.O-leerders en -onderwysers bestee word en die salarisse van gr.O-onderwysers moet ondersoek word.
“Kinders in gr.O word oor die algemeen net effens gestimuleer en onderwysers is nie voldoende gekwalifiseer nie. Baie van hulle is slegs in tydelik poste aangestel.”
Prof. Yusef Waghid, dekaan van die fakulteit opvoedkunde aan die Universiteit van Stellenbosch, het gesê genoeg geld beteken nie noodwendig beter onderwys nie. “Die stelsel moet meer doelgerig wees.”
- Volksblad