'Gehoorgestremde nie Lotto-wenner'
2010-02-16 07:32
Aldi Schoeman
Kaapstad - Stanley Philander is nié die wenner van meer as R91 miljoen in die nasionale lotery se Powerball-spel soos vroeër berig is nie.
Prof. Vevek Ram, uitvoerende hoof van die Nasionale Loteryraad, het Maandag gesê iemand anders is die wenner en dié verkies om anoniem te bly.
Nadat die SondagSon berig het dat Philander (52), ’n gehoorgestremde man wat glo in ’n ysterware-winkel in Wynberg werk, die land se nuutste kitsmiljoenêr is, het verskeie koerante hom probeer opspoor.
Foto’s is ook geneem van hom en sy vrou, Diana (50), ook gehoorgestremd, en hul twee kinders, Logan (9) en Kirsten (6).
Luidens berigte is hulle oorval deur familie en vriende wat in hul rykdom wil deel. Daarom kruip hulle nou op ’n onbekende plek weg.
Pogings om hulle Maandag op te spoor, was onsuksesvol. Die drie ysterware-winkels in Wynberg het ontken dat Philander by hulle werk.
Thembi Tulwana, woordvoerder van die nasionale lotery-operateur Gidani, het gesê Philander het Gidani nie gekontak nie en Gidani het nie die wenner se naam bekend gemaak nie. Dit is onseker hoe die storie oor Philander se “groot geluk” bekend geword het.
Volgens Sershan Naidoo, woordvoerder van die Nasionale Loteryraad, maak die lisensie daarvoor voorsiening dat wenners anoniem kan bly as hulle dit verkies.
Die operateur is daarvoor verantwoordelik om seker te maak daar word aan die lisensievoorwaardes voldoen.
- Die Burger