'Geestelike hoer' sê jammer oor eindtyd

2011-05-25 09:03

Nelspruit - “Ons is geestelike hoere. Ons het gesondig deur mense te verwar.”

So het Johannes Coetzee, die man wat landwyd verkondig het die wêreld sou Saterdag tot ’n einde kom, Dinsdag hier gesê.

“Ons smeek om vergifnis by God?. Dit is duidelik dat ons inligting wat in die Bybel is, verkeerd vertolk het en daarmee mense op straat laat rondhol het.”

Coetzee en sy “broers” het Dinsdag op ’n nuuskonferensie by hul klein kantoortjie in Samora Machel-rylaan, Nelspruit, aan die media probeer verduidelik wat Saterdag nie gebeur het nie.

“Ons is wêreldwyd sedert Sondag druk besig om weer ’n studie van die Bybel te maak om vas te stel wat volgende gebeur.”

Hy het egter volgehou die datum van die wegraping (21 Mei) “is vas” en dat dit steeds deel uitmaak van die aanloop tot die einde van die wêreld. Coetzee verkondig steeds dat die wêreld op 21 Oktober deur “swael en vuur” vernietig sal word.

“Ons weet ons is die grootste fools op straat. Maar ons weet dat daar nou ten minste ’n stewige grondslag gelê is vir die einddatum.”

Volgens Coetzee was hulle oor twee aspekte verkeerd: die wegraping en die aardbewing wat voorspel is.

Terwyl hulle Saterdag in die hotel in Johannesburg op die einde gesit en wag het, was hulle nie bang nie.

“Daar was vrede in ons harte. Maar toe niks gebeur nie, het vrees ingegryp en het ons bang geword.”

Sy seuns, Johan (22) en Joubert (21), het die internet Saterdagnag voortdurend dopgehou op soek na tekens van aardbewings.

“Hulle het my omstreeks 01:30 wakker gemaak en gesê: ‘Hier kom dit nou.’ Dit was toe hulle tekens op die internet gesien het van aardbewings in Nieu-Seeland.”

Coetzee het op die nuuskonferensie in ’n stadium in trane uitgebars.

“Blameer my. Ek was eintlik baie onkundig oor die hele situasie.”

Hy het ook sterk teen leraars uitgevaar. “In die kerke lieg hulle vir die mense. Satan sit in die kerk en hulle besef dit nie.”

Op die vraag of hulle weer op 22 Oktober ’n nuuskonferensie sal moet hou, het hy beslis geantwoord: “Nee. Kom ons kyk wat gebeur.”