'Geen omstredenheid' rondom Motlanthe se vakansie
2013-02-10 14:52
Johannesburg – Thabo Masebe, adjunkpresident Kgalema Motlanthe se woordvoerder, het Sondag gesê hy weet nie “hoekom daar enige omstredenheid is” rondom Motlanthe se vakansie in die Seychelle nie.
Dit volg ná ‘n beroep deur die DA vir die openbare beskermer om die beweerde gebruik van openbare fondse om ‘n deel van Motlanthe se vakansie te betaal te ondersoek.
“Die adjunkpresident – sodra hy adjunkpresident word – is sy sekuriteit die verantwoordelikheid van die staat,” het Masebe gesê.
“Dit is hoekom alle reiskostes, of dit nou privaat of amptelik is, die verantwoordelikheid van die staat is.”
Die staat was verantwoordelik vir Motlanthe se veiligheid, dit bepaal hoe hy vervoer sal word.
“Hy [Motlanthe] het vir sy eie vakansie betaal, die staat het nie betaal nie, die staat betaal net vir vervoer,” het Masebe gesê.
Volgens City Press is Motlanthe drie dae nadat hy teen pres. Jacob Zuma verloor het om as president van die ANC verkies te word deur die SA-lugmag na die Seychelle gevlieg.
Motlanthe, sy lewensmaat en minstens vyf lyfwagte het by die luukse Desroches Island Resort ingeboek.
Die koerant berig hy is in besit van verskeie dokumente wat die vakansie se onkoste uiteensit, insluitend akkommodasie en reiskoste.
Die dokumente toon glo dat ‘n plaaslike huurvlug gekontrakteer is om Motlanthe en sy entourage te vervoer nadat ‘n Air Force Falcon 900 nie op Desroches Eiland kon land nie weens die “ongeskiktheid van die aanloopbaan”.
Die koerant berig dat die koste van die huurvlug, wat glo R83 000 beloop het, deur die staat gedek is.
Dit berig ook dat die groep drie villas vir 12 aande bespreek het teen ‘n koste van meer as R2 miljoen.
– Volg Nuus24 op Twitter
- SAPA
