Geen mediese parool vir Selebi
2011-12-08 09:03
Pretoria – Die departement van korrektiewe dienste sê dit is te gou om Jackie Selebi, voormalige nasionale polisiehoof, vir mediese parool te oorweeg.
Selebi het hom Maandag aan owerhede by die Pretoria-Sentraal-gevangenis oorgegee nadat hy die naweek in die hospitaal deurgebring het.
Hy het verlede Vrydag ineengestort nadat die appèlhof sy aansoek om appèl teen sy skuldigbevinding van die hand gewys het.
Selebi word dag en nag deur mediese personeel in die hospitaalafdeling van die gevangenis behandel, maar owerhede wil nie die aard van sy siekte bekendmaak nie.
Die 61-jarige Selebi se regspan het gesê hulle het nie aansoek gedoen vir 'n vroeë vrylating op mediese parool nie.
Zacharia Modise, hoof-adjunkkommissaris van die departement van korrektiewe dienste, het gesê indien 'n aansoek ingedien word sal Selebi deur 'n span spesialiste ondersoek word om vas te stel of hy vir mediese parool in aanmerking kom.
"In die stadium is dit te vroeg om te praat oor mediese parool."
Sommige van die voorwaardes vir mediese parool is in September aangepas. Gevangenes wat aansoek doen om mediese parool sal deur onafhanklike spesialiste getoets word. Hulle sal ook voor 'n kommissie van ondersoek verskyn, waarna die paroolraad 'n finale besluit maak.
– Lees meer hier
– Volg Nuus24 op Twitter