'Geen krisis met wapentransaksies' – ANC
2009-08-06 12:33
Kaapstad – Die ANC se parlementêre koukus het met groot kommer gereageer op die DA se stelling dat daar ‘n krisis in die land se wapentransaskies is.
In ‘n verslag wat die DA verlede week aan die media uitgereik het, sê die DA-LP David Maynier dat die Suid-Afrikaanse regering met die toestemming van die nasionale komitee oor beheer oor konvensionele wapens (NCACC) by onwettige transaksies betrokke is.
Dié verslag het ook aangevoer dat die transakies nie behoorlik oorweeg word nie en dat daar ‘n gebrek aan ’n kworum is.
Volgens die verslag het die regering wapens aan ’n rits sogenaamde “muishondlande” verkoop.
Maar in reaksie hierop het die ANC gesê Maynier "wil nie ‘n goeie storie deur feite laat bederf word nie."
“Die betroubaarheid en of die wettigheid van sy sogenaamde bronne word sterk getwyfel. Dit het tyd geword vir die DA om hul samesweringsteorieë met feite te staaf.”
Volgens die ANC het die Verenigde Nasies se Sekerheidsraad nie sankies op die wapens van Zimbabwe of Sirië - van die lande waaroor die DA ongelukkig is - geplaas nie.
Die ander lande ter sprake is Libië en Venezuela. Die VSA het sanksies teen wapenhandel met hierdie twee lande geplaas, maar die ANC het dit duidelik gemaak dat Suid-Afrika nie hierdie sanksies volg nie.
– Sapa