Geen herverhoor vir Moodley
2012-02-01 10:22
Johannesburg – Die veroordeelde moordenaar Donovan Moodley se aansoek om 'n herverhoor is in die hooggeregshof in Johannesburg geweier.
Moodley is in 2005 skuldig bevind aan die student Leigh Matthews se moord en menseroof en die afpersing van haar pa, Rob.
"Ek is nie oortuig dat die applikant na wense verduidelik het hoekom dit hom byna ses jaar geneem het om met hierdie aansoek vorendag te kom nie," het regter Joop Labuschagne gesê.
Labuschagne het ook daarop gewys dat Moodley in 'n verklaring skuld op die aanklagte teen hom beken het, en dat hy spesifiek gesê het dat hy nie gedwing of beïnvloed was om dit te doen nie.
Moodley het ook herhaaldelik die akkuraatheid van sy bekentenis bevestig in verskeie aansoeke om appèl teen sy vonnis.
"Die applikant se weergawe van gebeure is na my mening vergesog en onrealisties," het Labuschagne gesê.
Hy het verskeie teenstrydighede in Moodley se weergawe van gebeure uitgewys.
Familielede van Matthews het hul koppe geskud toe hulle aanhoor hoe haar moord in Moodley se nuwe weergawe beskryf word.
Moodley is lewenslange tronkstraf opgelê vir die moord, 15 jaar vir die ontvoering en 10 jaar vir afpersing.
Die naakte lyk van Matthews, wat by die Bond-universiteit in Sandton ontvoer is, is in Julie 2004 in die lang gras in die Walkerville Manor-gebied, suid van Johannesburg, gevind.
Hy het verlede Woensdag sy aansoek om 'n herverhoor begin en gekies om homself te verdedig.
Die waarheid is volgens Moodley dat drie dwelmsmouse hom gedreig het om by die ontvoering betrokke te raak en dat hy moes toekyk hoe een van hulle, slegs bekend as Jemba, haar doodgeskiet het, het Beeld vroeër berig.
Hy het aanvanklik skuld beken, maar beweer nou hy het toe gelieg omdat brig. Piet Byleveld, ondersoekbeampte in die saak, hom gedwing het om ’n bekentenis af te lê.
Volgens hom het Byleveld ook bewyse gemanipuleer om sy “een-man”-weergawe te staaf.
Zaais Van Zyl, staatsaanklaer, het vroeër aangevoer dat Moodley tydens die aanvanklike verhoor die geleentheid gehad het om aan die hof te sê of hy gedwing is om die bekentenis af te lê.
– Volg Nuus24 op Twitter