‘Geen bewyse dat xenofobiese geweld gaan opvlam’
2010-07-03 08:52
Die Burger
De Doorns. - Met hernude vrese dat xenofobie ná die Wêreldbeker-sokkertoernooi kan opvlam, sluimer dié moontlikheid ook in dié dorp.
Sowat 3000 immigrante is verlede jaar in De Doorns ontheem.
Simphiwe Mayeki, die Breedevallei-munisipaliteit se areabestuurder vir De Doorns, het gister gesê daar word gereeld met die polisie, gemeenskapspolisiëringsforum en maatskaplike werkers vergader en daar is “geen konkrete” bewyse dat xenofobiese geweld binnekort gaan opvlam nie.
Die munisipaliteit sukkel nog om die oorblywende Zimbabwiërs te hervestig, het Mayeki gesê. Die kamp op die sportveld is reeds amptelik gesluit, maar van die Zimbabwiërs eis R1000 vergoeding voordat hulle elders ’n heenkome soek. Aanvanklik het sowat 1000 mense in die kamp op De Doorns se sportterrein gebly. Tans is daar sowat 250.
Baie van die mense wat vroeër hier gebly het, is reeds in hul tuislande of elders in Suid-Afrika hervestig, het Mayeki gesê.
Sommige van die Zimbabwiërs wat in die kamp bly, voel egter steeds bedreig.
“In Stofland is dit nog nie veilig nie. Dit is gevaarlik. Hulle noem ons ‘makwerekwere’ en sê: ‘Hei, immigrant, gaan terug huis toe’,” het Elton Zinzo (41) gesê.
Inwoners van Stofland, waarna ’n paar Zimbabwiërs sedert November teruggekeer het, het gesê hulle glo nie daar sal ’n “bakleiery” wees nie, maar wek ook nie die indruk dat Zimbabwiërs met ope arms verwelkom sal word nie.
“Ons gaan nie weer met dié mense baklei nie, maar hulle moenie weer tussen die gemeenskap kom nie,” het Winston Malgas (37) gesê.
Michael Koopman (24) is egter bevrees as xenofobiese geweld elders uitbreek, dit ook in De Doorns kan gebeur.
“Dan is daar ’n verskoning vir baklei,” het hy gesê.
Lt.kol. Desmond van der Westhuizen, bevelvoerder van die De Doorns-polisiestasie, weet nie van enige broeiende onrus nie. “Ons monitor die situasie,” het hy gesê.
Volgens van der Westhuizen is die meeste Zimbabwiërs seisoenarbeiders en het tans nie werk nie. Dus het baie van hulle al die streek verlaat. Verlede jaar het verskeie Zimbabwiërs ook aan Die Burger gesê hulle is van plan om die streek aan die einde van die druiweseisoen te verlaat .
Die voorsitter van die Hexriviervallei Tafeldruif-vereniging, me. Elza Jordaan, is soos die meeste boere in die streek tans op vakansie en was gister onbewus van ’n plofbare situasie.
Volg Nuus24 op Twitter.
- Die Burger