Gee meer vir onderwys, sê Zuma
2010-07-11 22:24
Johannesburg - Regerings moet twee keer so hard probeer om onderwys beskikbaar te stel aan die 72 miljoen kinders oor die wêreld wat nie in staat is om skole by te woon nie, het pres. Jacob Zuma by 'n Wêreldbeker-onderwysberaad gesê.
"Daar is ongeveer 72 miljoen kinders, amper die helfte van hulle in Afrika, wat nie skoolgaan nie," het Zuma tydens die beraad gesê, wat by die Presidensiële gastehuis in Pretoria plaasgevind het.
"Die komende Verenigde Nasies- [Millennium Ontwikkelingsdoelwitte (MDG)] vergadering in September en die moontlike vertraging ten opsigte van die bereiking van die MDG-doelwitte teen 2015, moet ons almal wat hier teenwoordig is aanmoedig om ons pogings te verdubbel om te verseker dat die lyding van diegene wat hierdeur geraak word nie verleng word nie."
Zuma het gesê daar is "baie" wat owerhede kon doen om seker te maak onderwysdoelwitte word bereik, insluitend die bekendstelling van inisiatiewe om kos en skooluniforms te voorsien.
"Ons moet voedingskemas befonds om seker te maak kinders is fisiek gereed om te leer," het hy gesê.
"Ons moet bande met gemeenskaps- en nie-regeringsorganisasies, die godsdienstige sektor en ander versterk om ons te help om kinders in afgeleë gebiede te bereik wat nie skoolgaan nie.
- Volg Nuus24 op Twitter
- SAPA