‘Gee SA boere in Zim dié pensioen’
2011-02-19 10:01
Talle bejaarde Suid-Afrikaanse boere in Zimbabwe het so verarm dat die maandelikse ouderdomspensioen van R1 080 wat in Suid-Afrika aan bejaardes betaal word, dié mense baie sal help.
Daarom gaan die burgerregte-organisasie AfriForum en Suid-Afrikaanse boere wat lede van die Commercial Farmers’ Union (CFU) in Zimbabwe is, die Suid-Afrikaanse regering vra om die maandelikse ouderdomspensioen ook aan bejaarde Suid-Afrikaanse boere in Zimbabwe beskikbaar te stel.
“In dié stadium is die wet oor ouderdomspensioen baie beperkend en bepaal dit iemand moet fisiek in Suid-Afrika wees om ’n uitbetaling te kry.
Ons wil hê die regering moet ’n uitsondering maak om dit vir Suid-Afrikaanse boere hier moontlik te maak om die pensioengeld by die Suid-Afrikaanse ambassade in Harare te gaan haal,” het mnr. Willie Spies, regsverteenwoordiger van AfriForum, Vrydag gesê.
Die versoek aan die regering gaan gedoen word ná ’n vergadering Donderdag in Harare tussen die Suid-Afrikaanse lede van die CFU, prof. Mlungisi Makalima, Suid-Afrikaanse ambassadeur in Harare, en ambassadepersoneel.
“Die ambassadeur (Makalima) en sy personeel het Donderdag in Harare talle aangrypende verhale gehoor. ’n Gryskop-omie was in trane toe hy gepraat het,” het Spies gesê.
Volgens hom het Makalima aan die boere gesê die ambassade sal op diplomatieke terrein alles moontlik doen om Suid-Afrikaanse boere in Zimbabwe by te staan.
- Beeld