Gebuite kuns word skroot
2012-02-01 09:07
Johannesburg – Kunswerke ter waarde van meer as R500 000 is die afgelope jaar uit die Johannesburgse Kunsmuseum gesteel – moontlik selfs as skrootmetaal.
Hoewel die kunswerke verseker is, weier die versekeraar om te betaal aangesien daar geen bewys van inbraak is nie.
Luidens ’n geskrewe antwoord op ’n vraag van Nonhlanhla Sifumba, DA-raadslid, op ’n metroraadsvergadering is vyf kunswerke, insluitend dié van internasionale kunstenaars, gesteel.
Die kunstenaars wie se werk voete gekry het, is Jules Dalou, Tracey Rose, Ernest Ullman, Sydney Kumalo en Romano Romanelli.
Die Dalou, genaamd Genl. Lazare Hoche, is ’n bronsbeeldhouwerk wat dateer van die laat 19de eeu.
Die 71 cm-kunswerk is Woensdag 12 Januarie uit die museum gesteel en is R250 000 werd.
Hoche was ’n Franse soldaat wat later generaal geword het.
Dalou (1838 - 1902) was ’n Franse realistiese beeldhouer wie se werk wêreldbekend is.
Romanelli (1882 - 1969) se beeldhouwerk Peter Pan, wat sowat R110 000 werd is, is ook gesteel.
Die gesteelde Kumalo-kunswerk is Mourning Woman, wat R130 000 werd is.
Rose se kunswerk sonder titel, ook ’n bronswerk, is R50 000 werd, maar het nie aan die galery behoort nie.
Chris Vondo, burgemeesterskomiteelid vir gemeenskapsontwikkeling, het in ’n geskrewe antwoord gesê daar was die laaste paar jaar ’n aantal ingrypings om die museum se veiligheidsmaatreëls te verbeter.
“Meer veiligheidsbeamptes is aangestel en R1 miljoen is opsy gesit vir die opgradering van kringtelevisiekameras.”
Weens ’n oponthoud met kwotasies is die kringtelevisiekameras uit die 2011-’12-begroting gesny. Daar sal in die 2012-’13-begroting voorsiening gemaak word vir die opgradering, het hy gesê.
Gordon Massie, besturende direkteur van ArtInsure in Johannesburg, het gesê kunsdiefstal neem wêreldwyd toe. In Europa word brons- en ander beeldhouwerke vir skroot gebuit.
Antoinette Murdoch, kurator van die museum, het gesê kunswerke wat gesteel word, is meestal onvervangbaar.
“Ek en my personeel werk hard om ons swakhede te verbeter en vra hulp van die publiek; geldelik en op praktiese maniere,” het Murdoch gesê.
– Volg Nuus24 op Twitter
- Beeld
