Geboorte op straat: Dept. ondersoek kliniek

2012-11-22 16:45

Pretoria – ‘n Vrou wat op ‘n sypaadjie gekraam het nadat ‘n mediese fasiliteit haar weggewys het, sal met beamptes van die departement van gesondheid vergader om ‘n beëdigde verklaring af te lê.

Gauteng se departement van gesondheid het vroeër gesê hy ondersoek die Soshanguve-kliniek nadat Nomsa Mathebula na bewering buite op die sypaadjie die lewe aan haar baba moes skenk.

Die departement meen die manier waarop die pasiënt behandel is, is onmenslik en onaanvaarbaar.

Na bewering het die kliniek se verpleegsters die pasiënt verlede week weggewys toe sy begin kraam het. Hulle het glo vir haar gesê sy moet na ‘n groter hospitaal gaan, omdat haar bloeddruk te laag was.

Mathebula het egter buite die mediese fasiliteit inmekaargesak en op die sypaadjie geboorte gegee.

Eyewitness News berig Simon Zwane, ‘n woordvoerder vir die departement, sê hul aanvanklike ondersoeke dui reeds daarop dat die verpleegsters nie die regte prosedure gevolg het nie.

Volg Nuus24 op Twitter